Evropa sanksionon Rusinë…sërish!

Vendet anëtare të Bashkimit Evropian janë dakordësuar mbi sanksionimin e Rusisë, sërish. Çështja Navalny ka shtyrë unionin të marrë këtë vendim të prerë, si një përpjekje për të liruar opozitarin rus nga burgu.

Këto masa do të merren nën efektet e European Magnitsky Act, një marrëveshje midis vendeve të BE-së kundër shkeljes së të drejtave njerëzore. Për vendet anëtare, arrestimi dhe dënimi i Alexei Navalny-t është tërësisht në kundërshtim me parimet themelore të këtij akti.

Akordin e ka bërë të ditur përfaqësuesi i lartë i BE-së, Josep Borrell.

“Evropa do të marrë masa shtrënguese mbi fuqinë që i jep marrëveshja Magnitsky. Emrat e shënjestruar do të bëhen me dije brenda javës”.

Një paralajmërim i sanksioneve ndaj Rusisë erdhi të dielën e 21 shkurtit nga krahu i djathtë i Navalny-t, Leonid Volkov. Ky i fundit cilësoi se “vetëm gjuha e forcës dhe sanksionet mund të lirojnë opozitarin rus”.

Kryediplomatët e Austrisë dhe Gjermanisë bërë thirrje paraditen e sotme mbi unitetin e BE-së. Kërkesa e masave ndaj Rusisë ishte kush i domosdoshëm për të treguar fuqinë e bashkësisë evropiane.

Mendohet se personat që do të sanksionohen do të jenë aleatë të ngushtë të presidentit rus, Vladimir Putin. Kjo nuk është hera e parë që Evropa merr të tillë vendimi. Në dhjetor 2019, unioni ra dakord të zgjaste masat ndaj Rusisë deri në korrik 2020. Dëmi tërësor ndaj shtetit siberik mendohet se shkoi deri në 100 miliardë euro.

I pranishëm në takim me kryediplomatët evropianë ka qenë virtualisht edhe Sekretari amerikan i Shtetit, Antony Blinken. Nuk ka asnjë të dhënë ndërkohë nëse SHBA-ja do të vendosë gjithashtu sanskione.

Këto zhvillime pritet të sjellin një dinamikë të re në çështjen Navalny në Rusi. Nëse shtrëngimet ndikojnë negativisht në Rusi, mund të kemi lirimin e kritikut të Kremlinit më shpejt nga se pritej.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.