Euro 2024

Euro 2024: Ndryshime në listën e Holandës, ftohet Joshua Zirkzee


Joshua Zirkzee

Sulmuesi i Bologna-s, Joshua Zirkzee, është thirrur në skuadrën e Holandës për Euro 2024 pasi mesfushori i Atalanta-s, Teun Koopmeiners u tërhoq për shkak të dëmtimit.

Sulmuesi fillimisht ishte lënë jashtë nga trajneri Ronald Koeman për turneun që fillon të premten në Gjermani.

Holanda është në grup me Francën, Poloninë dhe Austrinë.

Ata kanë pasur shumë probleme me dëmtimet, pasi sulmuesi i Ajax Brian Brobbey po përpiqet gjithashtu të jetë i aftë për Euro 2024.

Mesfushori i Atalanta-s, Koopmeiners, u desh të tërhiqej për shkak të një dëmtimi muskulor, ashtu si edhe shoku i tij i klubit, Marten de Roon. Për shkak dëmtimi u tërhoq edhe Frenkie de Jong.

Tani Koeman ka shtuar Zirkzee-n në skuadër si një zëvendësim për Koopmeiners, edhe pse ata luajnë në role thelbësisht shumë të ndryshme.

23-vjeçari nuk ka asnjë paraqitje të vetme për Holandën, por shënoi shtatë gola në 19 paraqitje për ekipin U-21.

Zirkzee shënoi 12 gola dhe dha shtatë asistime në 37 ndeshje konkurruese për Bologna-n këtë sezon dhe është në negociata me Milan-in, si dhe me interes nga Juventus, Arsenal dhe Manchester United.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore