![](https://albanianpost.com/wp-content/uploads/2024/07/iuklkiyo.jpg)
Prokuroria e Posaçme SPAK mbyll hetimet dhe i komunikon akuzat për pastrim parash dhe përkrahje të autorit të krimit Erzen Breçanit dhe personave të tjerë anëtarë të grupit që janë arrestuar.
Breçani u paraqit në SPAK, pak ditë pasi Gjykata e Posaçme e Apelit vendosi t’i ndryshonte masën e sigurisë nga “arrest në burg” në “arrest shtëpie”.
Ai kishte kërkuar disa herë zbutje të masës së sigurisë pasi pretendonte se kishte probleme shëndetësore dhe vuante nga klaustrofobia.
Pretendoi se i rrezikohej jeta në qeli, GJKKO rrëzon kërkesën e Erzen Breçanit për liri
Ish-drejtori i policisë së Tiranës u arrestua më 20 nëntor 2023 dhe akuzohet për pastrim parash e përkrahje të autorit të krimit.
Gjykata e Posaçme e Apelit, me trup gjykues monokratik të përbërë nga gjyqtari Engert Pëllumbi, vendosi ndryshimin e vendimit nr. 76, datë 30.05.2024 të Gjykatës së Posaçme të Shkallës së Parë për Korrupsionin dhe Krimin e Organizuar, në këtë mënyrë:
-Pranimin e kërkesës; zëvendësimin e masës së sigurimit “Arrest në burg”, parashikuar nga neni 238 i K.Pr.Penale, të caktuar ndaj personit nën hetim E.B., me vendimin nr. 124., datë 17.11.2023 të Gjykatës së Posaçme të Shkallës së Parë për Korrupsionin dhe Krimin e Organizuar, verifikuar me vendimin nr. 128, datë 23.11.2023, të kësaj gjykate dhe miratuar me vendimin nr. 87-2024-4 (1), datë 04.01.2024 të Gjykatës së Posaçme të Apelit për Korrupsionin dhe Krimin e Organizuar, me masën e sigurimit “Arrest në shtëpi”, e parashikuar nga neni 237 i këtij kodi.
-Urdhërohet lirimi i personit nën hetim E.B., nga ambientet e paraburgimit, nëse nuk mbahet i izoluar për ndonjë shkak tjetër.
-Urdhërohet personi nën hetim E.B., që të mos largohet nga banesa e tij e cila ndodhet në adresën ***, si dhe që të mos komunikojë me persona të tjerë, me përjashtim të atyre të cilët jetojnë në të njëjtën banesë.
-Ngarkohet Prokuroria e Posaçme kundër Korrupsionit dhe Krimit të Organizuar si dhe shërbimet e policisë gjyqësore përkatëse për zbatimin e këtij vendimi.
-Kundër këtij vendimi mund të bëhet rekurs në Gjykatën e Lartë brenda 45 ditëve nga e nesërmja e njoftimit të tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com