Elon Musk nuk do t’i bashkohet bordit të Twitter-it

Elon Musk ka vendosur të mos i bashkohet bordit të platformës Twitter.

Kështu ka bërë me dije shefi ekzekutiv i kompanisë, Parag Agrawal.

Pritej që emërimi i Musk-ut të ndodhte të shtunën e 9 prillit, pasi javën e kaluar ai ka zbuluar se kishte blerë 9.2 për qind të aksioneve në platformën e mediave sociale.

Por Musk-u “ndau po atë mëngjes se nuk do të bashkohet më me bordin”, sipas Agrawal.

Megjithatë, ai ka shtuar se Musk-u mbetet aksioneri më i madh i Twitter-it dhe se firma do të mbetet e hapur ndaj kontributit të tij.

Ai zotëron më shumë se katër herë të 2.25-përqindëshit të aksioneve të bashkëthemeluesit të Twitter-it, Jack Dorsey.

Sakaq, aksionet në Twitter janë rritur me mbi 27 për qind të hënën e kaluar pasi u zbuluan aksionet e Musk.

Gjatë fundjavës, Musk-u ka sugjeruar ndryshime në shërbimin e abonimit Premium, Twitter Blue, duke përfshirë uljen e çmimit, ndalimin e reklamave dhe dhënien e opsionit për të paguar në kriptomonedhën Dogecoin.

Po ashtu ka pyetur mbi 81 milionë ndjekësit e tij nëse Twitter-i po “vdes” dhe nëse selia e tij duhet të kthehet në një strehë për të pastrehët.

Sipas Agrawal, Twitter-i i ka ofruar Musk-ut një vend në bord, pasi kompania kishte besuar se ishte “rruga më e mirë përpara”, me anëtarët e bordit që duhet “të veprojnë në interesin më të mirë të kompanisë dhe të gjithë aksionarëve”.

Dhe, për vendimin e marrë nga Musk, ai ka thënë se është për më të mirën.

“Do ta vlerësojmë gjithmonë kontributin e aksionarëve tanë, pavarësisht nëse ata janë në bordin tonë apo jo”, ka përfunduar ai.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.