El Salvador me ‘Qytetin Bitcoin’ të mbështetur nga kriptomonedha

El Salvadori planifikon të ndërtojë “Qytetin Bitcoin”, të parin në botë të financuar nga obligacione të mbështetura në Bitcoin.

Kështu ka bërë me dije presidenti Nayib Bukele, i cili përpiqet të shfrytëzojë kriptovalutën për të nxitur investimet në vendin e Amerikës Qendrore.

Duke folur në një ngjarje për mbylljen e një promovimi njëjavor të Bitcoin-it në El Salvador, Bukele ka thënë se qyteti i planifikuar në rajonin lindor të La Union do të merrte energji gjeotermale nga një vullkan.

Dhe se nuk do të caktojë asnjë taksë përveç tatimit mbi vlerën e shtuar, tregon agjencia e lajmeve “Reuters”.

“Investoni këtu dhe bëni të gjitha paratë që dëshironi. Ky është një qytet plotësisht ekologjik që funksionon dhe merr energji nga një vullkan”, ka sqaruar ai.

Bukele ka zbuluar se gjysma e TVSH-së së vendosur do të përdoret për të financuar obligacionet e emetuara për ndërtimin e qytetit dhe gjysma tjetër do të jetë për shërbime të tilla si grumbullimi i plehrave.

Kjo duke vlerësuar se infrastruktura publike do të kushtonte afro 300 mijë Bitcoin.

Në muajin shtator, El Salvador u bë vendi i parë në botë që miratoi Bitcoin-it ligjërisht.

Megjithatë, edhe pse Bukele është një president popullor, sondazhet kanë treguar se vendasit janë skeptikë për dashurinë e tij ndaj kriptomonedhës.

Duke e krahasuar planin e tij me qytetet e themeluara nga Aleksandri i Madh, Bukele ka treguar se “Bitcoin City” do të jetë rrethor, me një aeroport, zona rezidenciale dhe tregtare dhe do të shfaqë një shesh qendror të projektuar për t’u dukur si një simbol Bitcoin-i nga ajri.

Sipas tij, El Salvador planifikon të emetojë obligacionet fillestare në vitin 2022.

/Albanianpost.com