El Pais: Spanja kërkon ekstradimin e Amant Josifit

Spanja ka kërkuar kërkon ekstradimin e biznesmenit Amant Josifi i akuzuar për mashtrimin e qytetarëve të saj përmes call centerave.

Kështu shkruan prestigjiozja “El Pais”., të dielën e 10 dhjetorit.

Sipas saj, një prokuror, një gjyqtar dhe një ekip policie janë duke luftuar prej gati 6 vitesh për të çmontuar atë që ata e konsiderojnë si një rrjet global për mashtrimin e mijëra personave me investime të rreme financiare.

Objektivi, thuhet në shkrim, është arritja e ekstradimit të Amant Josifit, 35 vjeç, biznesmen i njohur shqiptar, ish-këshilltar në Ministrinë e Mbrojtjes, tashmë banues në Dubai.

“Gjykata e ka kërkuar që në nëntor të vitit të kaluar, kur në Shqipëri u zhvillua një operacion europian në disa call centera në pronësi të Josifit, ku persona të punësuar mashtronin qytetarët nga e gjithë bota. Ata nuk gjetën asnjë gjurmë të biznesmenit dhe që nga ajo kohë ai figuron zyrtarisht si i arratisur nga drejtësia. Sipas urdhrit të ekstradimit, hetuesit e akuzojnë atë se ka luajtur “një rol udhëheqës në një organizatë kriminale ndërkombëtare që, me përdorimin e inxhinierisë sociale, përfiton nga kryerja sistematike e mashtrimeve shumë të sofistikuara”, thuhet në shkrimin e El Pais.

Arrestimi në Dubai i Amant Josifit tërhoqi vëmendjen e prestigjiozes spanjolle “El Pais” tre muaj më parë, e cila ka shpjeguar në një artikull veprimtarinë për të cilën ai akuzohet në Spanjë.

“El Pais” shkruante se Josifi është nga drejtuesit e dyshuar ndërkombëtarë të makro-mashtrimit të ndërmjetësve të rremë, me tentakula në të gjithë Evropën dhe rreth 17 mijë viktima të mundshme në Spanjë.

I arrestuari, i cili u ndalua më 6 shtator u përcaktua nga Mossos dhe Garda Civile  si objektiv “me vlerë të lartë”.

Spanjollja thekson se ai është lënë i lirë pas ndalimit në Dubai.

Josifi ishte pronar i disa qendrave të Call Center-it një vit më parë në Shqipëri, nga të cilat policia dyshon se viktimat në Spanjë janë thirrur për të ofruar investime false.

Ndaj tij gjykata spanjolle ka lëshuar një urdhër-arresti ndërkombëtar për krimet e organizimit kriminal dhe mashtrimit, ndër të tjera.

Josifi është i lirë, siç e ka konfirmuar edhe avokati i tij, i cili pretendon se prej tre vitesh jeton në vend.

Policia nuk arriti ta arrestonte në Shqipëri në makrooperacionin ndërkombëtar që kreu në nëntor të vitit të kaluar, me disa shtete të përfshira.

Josifi është një biznesmen i njohur në Shqipëri, me lidhje të forta politike.

Arrestimi i tij ka shkaktuar një tërmet në shtetin evropian, ku ai ka shërbyer si këshilltar i Ministrisë së Mbrojtjes në periudhën 2018-2020.

Një nga avokatët e tij në Spanjë pretendoi për këtë gazetë se Josifi është thjesht një biznesmen, se e kishte marrë me qira biznesin dhe se nuk e dinte se çfarë lloj aktivitetesh kryheshin aty.

Pavarësisht kësaj, Josifi nuk është paraqitur para autoriteteve që po e kërkonin.

Hetimi i çështjes ka zbardhur funksionimin e qendrave, të hapura 24 orë në ditë, me dhjetëra persona që pretendojnë se janë agjentë fals dhe të përkushtuar për të mashtruar qytetarët nga e gjithë bota.

Viktimat besonin se po investonin në produkte financiare me përfitim të lartë dhe kriptovaluta, por në realitet paratë shkonin direkt në xhepat e organizatës kriminale, sipas hetimeve.

Hetimi la jashtë agjentët e rremë, duke pasur parasysh vështirësinë e kombinimit të legjislacioneve të ndryshme të çdo vendi.

Policia i ka përqendruar të gjitha përpjekjet për t’u “prerë kokën” atyre që konsideron se janë përgjegjës në fund të rrjetit kriminal.

Në rastin e Josifit e vendosën në krye të degës së dedikuar për mashtrimin e qytetarëve spanjollë, me epiqendër Shqipërinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.