Presidenti i Ekuadorit, Guillermo Lasso shpalli gjendjen e jashtëzakonshme për 60 ditë në të gjithë vendin të enjten pas vrasjes me armë zjarri të kandidatit presidencial Fernando Villavicencio.
“Forcat e Armatosura që nga ky moment janë mobilizuar në të gjithë territorin kombëtar për të garantuar sigurinë e qytetarëve, qetësinë e vendit dhe zgjedhjet e lira dhe demokratike të 20 gushtit”, tha Lasso në një adresë të transmetuar në YouTube.
Lajmi u bë i ditur nga agjencia franceze “AFP”.
Sipas multimedialit britanik “BBC”, Fernando Villavicencio u sulmua teksa po largohej nga një tubim në qytetin verior të Quito-s të mërkurën.
Një anëtar i ekipit të tij të fushatës i tha mediave lokale se Villavicencio po hipte në një makinë kur një burrë doli përpara dhe e qëlloi në kokë.
Presidenti aktual Guillermo Lasso u zotua se “krimi nuk do të mbetet i pandëshkuar”.
Dëshmitarët thanë se 59-vjeçari u qëllua tre herë, shkruan “Reuters”.
I dyshuari u qëllua gjithashtu në një shkëmbim plumbash me sigurinë dhe më vonë vdiq nga plagët e tij, tha prokurori i përgjithshëm i vendit në mediat sociale.
Ata shtuan se nëntë persona kanë pësuar lëndime, duke përfshirë një kandidat për asamble dhe dy policë.
Raundi i parë i zgjedhjeve presidenciale është planifikuar të mbahet më 20 gusht.
Përveç sigurisë, fushata e Villavicencio-s ishte përqendruar në reduktimin e shkatërrimit të mjedisit dhe në trajtimin e korrupsionit.
Këtë temë ai e kishte mbuluar në një karrierë të mëparshme si gazetar.
Javën e kaluar, ai tha se ai dhe ekipi i tij ishin kërcënuar nga kreu i një bande të lidhur me trafikun e drogës.
Villavicencio, i cili ishte i martuar dhe kishte pesë fëmijë, ishte një nga tetë kandidatët në raundin e parë të zgjedhjeve, edhe pse jo kryesuesi.
Vrasja e tij pason atë të Agustín Intriago, kryebashkiak i qytetit Manta, në korrik dhe Omar Menéndez, kandidat për kryetar bashkie në qytetin e Puerto López, në shkurt.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Kurti e di që dëmi i Zajednicës e eklipson çdo përfitim nga anëtarësimi në KiE
-
Azerbajxhani miraton heqjen e vizave me Shqipërinë
-
Osama Hamdane: Ne pranuam marrëveshjen e armëpushimit pa hequr dorë nga vijat tona të kuqe
-
Maqedonci kërkon që KFOR-i të qëndrojë në Kosovë derisa Serbia të demokratizohet