Dr.Fauci: Udhëtimet për Krishtlindje do të nxisin përhapjen e Omicron-it

Udhëtimet gjatë Krishtlindjeve do të rrisin përhapjen e variantit Omicron të COVID-19, edhe në mesin e të vaksinuarve plotësisht. Në këtë përfundim ka dalë eksperti Anthony Fauci, për programin “Meet the Press” të “NBC”, të dielën e 19 dhjetorit.

Më tej, ai thotë se nuk ka asgjë për të dyshuar. “Omicron ka një aftësi të jashtëzakonshme për t’u përhapur”.

Dr. Fauci, i cili këshillon qeverinë amerikane për pandeminë, tha se varianti tani ishte “tërbuar nëpër botë”.

Vendet po shtrëngojnë masat, ndërsa varianti me mutacion të madh përhapet.

Në Evropë, Franca dhe Gjermania janë ndër ato vende që kanë vendosur disa kufizime gjatë periudhës së Krishtlindjeve sa u përket udhëtimeve, ndërsa Holanda ka vendosur një bllokim të rreptë.

Qeveritë po shtojnë gjithashtu programet e tyre të vaksinimit përforcues ndaj COVID-19.

Sipas studiuesve një dozë shtesë e vaksinës mund të sigurojë rreth 85% mbrojtje kundër sëmundjeve të rënda.

Të dielën, Dr. Fauci tha se përhapja e shpejtë e Omicron-it në SHBA mund të ketë një ndikim serioz në shërbimet shëndetësore në të gjithë vendin.

“Spitalet tona, nëse gjërat duken sikur po duken tani, do të jenë shumë të stresuar”, paralajmëroi ai.

Dr. Fauci tha që njerëzit duhet të marrin masa paraprake, si: mbajtja e maskave për fytyrën dhe distancimi social.

Ai, gjithashtu, u bëri thirrje më shumë amerikanëve që të marrin vaksinën dhe vaksinat e tyre përforcuese.

“Dallimi midis një personi të vaksinuar dhe të përforcuar që ka një infeksion, dhe dikujt që ka një infeksion që nuk është vaksinuar kurrë – është një ndryshim i madh në lidhje me rrezikun e ashpërsisë”, tha ai.

Në një konferencë shtypi në Shtëpinë e Bardhë të premten, Dr. Fauci tha se të pavaksinuarit ishin në një rrezik shumë më të lartë të infeksionit serioz dhe shtrimit në spital.

Sipas Qendrave për Kontrollin dhe Parandalimin e Sëmundjeve (CDC), pothuajse 73% e popullsisë së SHBA-ve ka marrë të paktën një vaksinë kundër COVID-19. Deri më tani, pothuajse 30% kanë pasur një injeksion përforcues.

Vlerësimet e fundit të CDC-së sugjerojnë se varianti Omicron përbën rreth 3% të rasteve aktuale, shumica e të cilave janë regjistruar në shtetin e New York-ut.

Që nga fillimi i pandemisë, SHBA-të kanë regjistruar më shumë se 50 milionë raste të coronavirusit dhe më shumë se 800 mijë vdekje të lidhura me COVID-19.

Ndërsa në Shqipëri të vaksinuar me dy doza janë mbi 1 milion qytetarë dhe dozën përforcuese e kanë marrë 23 mijë qytetarë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.