Ekspertët e shëndetësisë u bëjnë thirrje rregullatorëve të miratojnë ilaçet e demencës

Rregullatorët shëndetësorë po nxiten që të miratojnë me shpejtësi dy ilaçe kundër demencës.

E gjitha kjo në mënyrë që të sigurohet që miliona njerëz që mund të përfitojnë të mos vuajnë nga harresa.

Rezultatet përfundimtare nga një studim historik konfirmuan se donanemabi, i bërë nga Eli Lilly, ngadalësoi rënien njohëse në pacientët me Alzheimer me 35 për qind.

Rezultatet e provës të publikuara vitin e kaluar treguan se një ilaç i dytë, lecanemab, i prodhuar nga Eisai dhe Biogen, uli normën me 27 për qind.

Sakaq, udhëheqësit e shëndetësisë përshëndetën ardhjen e ilaçeve si një pikë kthese në luftën kundër Alzheimerit, përmes së cilës sëmundja mund të bëhet po aq e menaxhueshme sa diabeti ose astma.

Susan Kohlhaas, drejtoresha ekzekutive e kërkimit dhe e partneriteteve në Alzheimer’s Research UK, mendon se është kritike që rregullatorët të veprojnë menjëherë për të shmangur pritjet për trajtime klinikisht efektive.

“Tani kemi në horizont dy trajtime që mund të ndryshojnë jetën e njerëzve me Alzheimer dhe duhet të shohim vendime të shpejta rregullatore në mënyrë që njerëzit që mund të përfitojnë nga këto trajtime të mos mbeten në harresë”, ka thënë Kohlhaas.

“Pas 20 vitesh pa ilaçe të reja për Alzheimerin, njerëzit e prekur nga kjo sëmundje meritojnë të kenë përgjigje për trajtimet e reja sa më shpejt që të jetë e mundur”, ka shtuar ajo.

Eli Lilly ka aplikuar për miratim për donanemab në SHBA dhe do ta bëjë këtë në MB në javët e ardhshme.

Lecanemab mori dritën jeshile në SHBA në fillim të këtij muaji, por është ende në pritje të miratimit nga Agjencia Rregullatore e Barnave dhe Produkteve Shëndetësore (MHRA) në MB.

Po ashtu është në pritje të miratimit në Australi.

Alzheimeri është shkaku më i zakonshëm i demencës, një nga kërcënimet më të mëdha shëndetësore në botë.

Numri i njerëzve që jetojnë me demencë globalisht parashikohet të trefishohet në 153 milionë deri në vitin 2050.

Dhe ekspertët kanë thënë se paraqet një kërcënim në rritje të shpejtë për sistemet e ardhshme shëndetësore dhe të kujdesit social në çdo komunitet, vend dhe kontinent.

Rezultatet përfundimtare të provës së donanemabit, të botuara në Gazetën e Shoqatës Mjekësore Amerikane dhe të prezantuara në Konferencën Ndërkombëtare të Shoqatës së Alzheimerit në Amsterdam, arritën në përfundimin se pas 76 javësh trajtimi kishte ngadalësuar rënien klinike me 35.1 për qind te njerëzit me Alzheimer të hershëm.

Kur rezultatet u kombinuan për njerëzit që kishin nivele të ndryshme të kësaj proteine, pati një ngadalësim 22.3 për qind në përparimin e sëmundjes.

Çka nënkupton se njerëzit me këtë sëmundje mund të vazhdojnë të kryejnë detyra të përditshme, duke përfshirë blerjet, mbajtjen e shtëpisë, menaxhimin e financave dhe marrjen e ilaçeve.

Rezultatet përfundimtare të provës – të njohura si Trailblazer ALZ-2 – ekzaminuan sigurinë dhe efikasitetin e ilaçit.

Studiuesit studiuan thuajse 1 mijë e 800 njerëz me Alzheimer në fazën e hershme.

Gjysma e tyre morën një infuzion mujor të donanemabit – i cili funksionon duke hequr një proteinë të quajtur amiloid që ndërtohet në trurin e njerëzve me Alzheimer – dhe gjysmës tjetër iu dha placebo për 18 muaj.

Studiuesit zbuluan se në një numër të vogël njerëzish në studim kishte disa efekte anësore serioze si ënjtja e trurit.

Ndërkohë, tre vdekje në grupin e donanemabit dhe një në grupin e placebo u konsideruan të lidhura me trajtimin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.