Ekskluzive me Arben Taravarin: Partia s’është pronë e Zijadin Selës, unë dëgjova zërin e popullit – Artan Grubi është përçarësi

Në intervistën e parë të dhënë për ndonjë media pas vendimit për t’iu bashkuar opozitës që tashmë funksionon nën emrin Lëvizja Evropiane për Ndryshim, Arben Taravari ka treguar për Albanian Post përse vendosi ta bëjë hapin politik që do ta determinojë të ardhmen e tij politike, të partisë së tij (e cila është ndarë) dhe mbase të vetë shtetit të Maqedonisë së Veriut.

I bashkuar me Izet Mexhitin (ish-nënkryetar i Bashkimit Demokratik për Integrim, Bilall Kasamin (Lëvizja Besa), Afrim Gashin (Alternativa) dhe Bekim Qokun (këshilltar i kryeministrit të Kosovës, Albin Kurti), Taravari beson se përfaqësojnë opsionin më serioz për ta mposhtur BDI-në, partinë që për dekada qëndron e para ndër partitë shqiptare në Maqedoninë e Veriut.

Taravari u nda nga Zijadin Sela, themeluesi i Aleancës për Shqiptarët, dhe njeriu më i afërt politik i tij deri para pak ditësh kur u ndan.

Sela e ka kundërshtuar vendimin, për të arbitrar, të Taravarit, që pa i konsultuar organet e partisë vendosi të kalojë me opozitën, prandaj edhe si kryetar i Kuvendit të Partisë, organi më i lartë në ASH, vendosi ta propozojë shkarkimin e Taravarit.

I pyetur për këtë situatë të ndodhur, Taravari nuk dëshiron të komentojë me nota negative për Selën. Thotë se respektin për të e ruan dhe se në fakt, lëvizja e tij e fundit është sipas mësimeve të vetë Selës.

“Themeluesi i partisë z.Sela ka të gjithë respektin e merituar të cilin ja kam dhënë në çdo rast ku kam pasur mundësinë”, deklaron Taravari për Albanian Post.

“Por partia nuk është pronë e askujt dhe sigurisht nuk është as e tija! Kjo madje është një nga filozofitë që e karakterizonte z.Sela gjatë bashkëpunimit tonë dhe unë e çmoj për këtë”, pohon Taravari.

Sa i përket asaj se më kë qëndron elektorati i Aleancës për Shqiptarët, me Taravarin që lëvizi, apo me Selën dhe pjesën tjetër të partisë, thotë se kush nuk e ka të qartë “se kush e ka mbështetjen në bazë, ju ftoj të bëni një vizitë në degët tona dhe do ta kuptoni se çfarë Fryme të jashtëzakonshme ka në popull dhe në bazë”.

“Ndryshimi ka nis, jo sepse e zgjodha unë, por sepse e zgjodhi populli”, deklaron Taravari.

Një gjë është e çuditshme në artikulimin e kritikës së Taravarit në këtë intervistë.

Ai nuk kritikon Selën, por nuk kritikon as liderin e Bashkimit Demokratik për Integrim, Ali Ahmetin.

Syrin e ka të Artan Grubi, zëvendës-kryeministri i Maqedonisë së Veriut, për të cilin thotë se e ka kapur edhe vetë BDI-në.

Edhe situatën në partinë e tij ASH, ia atribuon Grubit, për të cilin deklaroi se instalon përçarje vazhdimisht.

Intervista e plotë e Albanian Post me Arben Taravarin

Albanian Post: Z. Taravari pse vendoset që të bashkoheni me opozitën shqiptare në Maqedoni të Veriut, ndryshe nga ajo se çfarë kishin vendosur organet e partisë?

Arben Taravari: Sepse vendosa të dëgjoj zërin e njerëzve që kësaj here është më i fortë se kurrë. Dhe dua t’ju qartësoj diçka ju dhe të gjithë lexuesve tuaj: Kishim oferta nga të dyja kampet, por është e papranueshme prej meje fatmirësisht dhe pjesës dërrmuese të partisë tonë që të jemi një parti ofertash. Ne jemi krijuar nga idealet që lidhen me mirëqenien e njerëzve dhe nuk mund të katandisemi në një parti ofertash!

Albanian Post: Njoftimi juaj se do bashkoheni me opozitën erdhi pas takimit që patët me Kryeministrin Kurti. A ishte Kurti faktori kryesor që iu shtyu ta merrnit këtë vendim?

Arben Taravari: Kurti është një nga kryeministrat që u përfshi në ditët e vendimit, njësoj si kryeministri Rama dhe kjo është e kuptueshme se janë të dy shqiptarë. Nuk është hera e parë që këto dy shtete marrin pjesë me të zgjedhurit e tyre në vendimet e politikës në Maqedoni, në kampin shqiptar. Kryeministri Kurti është përkrahës i rrugës tonë drejt Ndryshimit të sistemit, ai nuk është shkaku i vendimit tim por jam i lumtur që është në krahun tonë.

Albanian Post: Përse nuk shkuat në Kuvendin e Partisë, meqë edhe jeni kryetar? Përse nuk po shkoni në zyrë të partisë?

Arben Taravari: Zyra dhe Kuvendi i partisë janë dy gjëra të respektueshme dhe të çmuara. Kam shkuar në të dyja sa herë është dashur dhe do të duhet. Nëse organizimet e kamufluara dhe përçarëse të Artan Grubit ju duken kuvende dhe hotelet zyra, më vjen keq por nuk ndaj të njëjtin mendim me ju.

Albanian Post: Kuvendi Qendror i Aleancës për Shqiptarët iu shkarkoi nga pozita e kryetarit. A do ta njihni këtë akt të këtij organi të partisë, dhe nëse jo cilat janë veprimet që do t’i ndërmerrni?

Arben Taravari: Unë i kam dhënë fund çështjes së famshme së kinse “çështjes së partisë”. Është një intrigë e radhës e Grubit i cili tashmë në gjendje ankthi të thellë nuk po gjen më asnjë anije për të shpëtuar dhe sigurisht që nuk i shkon askush sepse i mbyturi të mbyt thotë populli. Për ata pjesëtarë të Aleancës të cilët për momentin janë viktimë e intrigave të tij, kam respekt, ju jap kohë, dhe uroj të kthehen në idealet e tyre. Këtu e mbyll këtë temë, le ta zgjidhi gjykata.

Albanian Post: Ju u bashkuat me opozitën, derisa ministrat në qeveri nuk i largonit, a ka kuptim kjo?

Arben Taravari: Unë nuk jam as babai i ministrave dhe as tutori i tyre! Kjo gjuhë është pikërisht pasojë e këtij sistemi që duam të ndryshoj dhe ndaj të kuptoj kur shprehesh kështu. Pasi unë shfaqa bindjen time politike gjithshka ndodhi aq shpejt sa ishte në kufijtë e filmit. Menjëherë nxorën nga puna znj.Bujare Abazi, pa asnjë shkak korrekt, vetëm sepse unë kisha shprehur mendimin tim të lirë. Atëherë edhe Fatmiri edhe Aziri, ministrat respektivë, më thanë se do të dorëhiqen, por pastaj duke parë shkarkimet në kohë rekord të njerëzve tanë pa asnjë shkak, atëherë vendosëm të prisnim dhe të shikonim se deri ku do të shkonte frika e tyre. Dhe po, profesionalisht duke folur, BDI-ja është në krizë paniku, ajo shkarkoi pa asnjë shkak, njësoj si në Korenë e Veriut dy ministrat tanë. Por e dini? Na bënë prapë nder, sepse u bindëm edhe më fort se ç’sistem diktatorial është ky që kemi!

Albanian Post: Kundër juve ka dalur themeluesi i partisë, Ziadin Sela, dhe eksponentë të lartë të Aleancës. Por, tek cili krah qëndron mbështetja në bazë, pasi të dyja palët pretendoni se keni shumicën?

Arben Taravari: Themeluesi i partisë z.Sela ka të gjithë respektin e merituar të cilin ja kam dhënë në çdo rast ku kam pasur mundësinë. Por partia nuk është pronë e askujt dhe sigurisht nuk është as e tija! Kjo madje është një nga filozofitë që e karakterizonte z.Sela gjatë bashkëpunimit tonë dhe unë e çmoj për këtë. Nëse ju nuk jeni të qartë se kush e ka mbështetjen në bazë, ju ftoj të bëni një vizitë në degët tona dhe do ta kuptoni se çfarë Fryme të jashtëzakonshme ka në popull dhe në bazë. Ndryshimi ka nis, jo sepse e zgjodha unë, por sepse e zgjodhi populli!

Albanian Post: Sipas sondazheve, fitueseve e zgjedhjeve në Maqedoni (në kampin maqedonas) do të jetë VMRO-DPMNE-ja. Kjo parti ka qëndrime publike kundër ndryshimeve kushtetuese, të cilat janë të domosdoshme për integrimin e Maqedonisë së Veriut, do ta pranoni ju si partner nëse bëheni pjesë e qeverisë së re?

Arben Taravari: Është shumë herët të flas për marrëveshjet e mëvonshme, por është gjithnjë koha e duhur të flas për parimet tona, dhe një prej tyre që është i pakontestueshëm është ndryshimi i mjaftueshëm i Kushtetutës për Integrimin në BE që është edhe destinata jonë.

Albanian Post: Ju jeni rreshtuar kundër BDI-së – nga radhët e së cilës doli edhe kryeministri i parë shqiptar – me të cilën keni qenë pjesë e qeverisë – Pse mendoni se BDI-ja duhet të shkojë në opozitë, duke qenë se me të njëjtën keni bashkëqeverisur?

Arben Taravari: E para të bashkëqeverisësh nuk domethënë që të shkrihesh në një parti. E dyta me gjithë respektin ju lutem citojeni të vërtetën e Kryeministrit shqiptar, ai nuk është vetëm shqiptari i parë por është edhe teknik. Kjo është një diferencë serioze në vet funksionet dhe peshën e tij. Unë uroj sa më shpejt të kemi një Kryeministër shqiptar të Parë me mandat dhe rol efektiv! Mendoj se BDI-ja e ka të rëndësishme për vet ekzistencën e saj shkuarjen në opozitë. Ajo tashmë është një parti e kapur në duart e Grubit dhe kjo ndihet në çdo hallkë të shtetit.

Albanian Post: Çfarë ndryshimesh mund të arrini me opozitën e bashkuar e cila udhëhiqet nga ish eksponentë të BDI-së?

Arben Taravari: Vetëm fakti që janë ish-anëtarë domethënë se ka ndryshuar. Duke ndërruar sistemin ne do sjellim lirinë e njerëzve për të provuar formula Qeverisëse të cilat nëse do të jenë të koruptuara si kjo që është, ata do ta kenë më të lehtë për t’i shkarkuar. Ndryshimi Ka Nis dhe tashmë është koha të kuptohet se populli është punëdhënësi i Qeverisë dhe jo e kundërta si ky sistem na ka bere të kuptojmë deri tani. Fryma që është ndez e ka mposhtur frikën. Kjo është Lëvizja e 8 majit dhe do mbahet mend në histori si Lëvizja e një populli që mundi të rilind!

Albanian Post: Faleminderit për mundësinë!

Arben Taravari: Faleminderit dhe ti!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.