Ekonomia ukrainase po shkon drejt vitit të vështirë 2024

Ekonomia e rrënuar e Ukrainës mund të përballojë edhe muajt e ardhshëm derisa të arrijë ndihma e huaj.

Por viti 2024 pritet të jetë më i ashpër se ky vit dhe Kievit do t’i duhet të mbështetet më shumë në burimet e veta.

Ukraina shpreson të mbyllë deficitin buxhetor prej 43 miliardë dollarësh të vitit të ardhshëm kryesisht me ndihmën e huaj financiare.

Pjesë e ndihmës janë edhe 18.5 miliardë euro nga Bashkimi Evropian dhe më shumë se 8 miliardë dollarë nga një paketë e SHBA-ve që përmban gjithashtu ndihmë jo-ushtarake.

Të dyja paketat janë bllokuar deri më tani – nga republikanët në Kongresin e SHBA-ve dhe nga Hungaria në Bashkimin Evropian – por përfundimisht duhet të kalojnë.

Nga ana tjetër, një pikëpyetje mbetet mbi ndihmën financiare të SHBA-ve, të paktën sipas ekonomistëve dhe diplomatëve të huaj.

Që nga pushtimi i Rusisë në shkurt 2022, Kievi i ka shpenzuar të gjitha të ardhurat në mbrojtje dhe ushtri, ndërsa shpenzimet për çdo gjë tjetër – nga pensionet te pagesat sociale – janë mbuluar nga dhjetëra miliarda dollarë ndihma të huaja.

Kyiv mund të bjerë disa miliardë dollarë më pak nga nevojat e tij financiare në vitin 2024, por një mungesë prej 10 miliardë dollarësh do të krijonte probleme për stabilitetin makroekonomik dhe programin e tij të Fondit Monetar Ndërkombëtar, sipas Olena Bilan, kryeekonomistja e Dragon Capital.

Sipas saj, FMN-ja – e cila miratoi një këst të ri prej 900 milionë dollarë këtë muaj – kërkon garanci të forta financimi për 12 muajt e ardhshëm, kështu që një rënie e konsiderueshme në financimin e jashtëm mund të vërë në pikëpyetje programin e saj.

“Qeveria ka një rezervë likuiditeti për janarin dhe shkurtin”, ka thënë Yurii Haidai, ekonomist i lartë në Qendrën për Strategjinë Ekonomike, një institut kërkimi në Kiev.

Mbushja e një zbrazëtie në buxhet mund të detyrojë Ukrainën të rrisë taksat, gjë që do të ishte kundërproduktive për ekonominë, apo edhe të printojë para për buxhetin, gjë që do të vinte gjithashtu me rreziqe, sipas Bilan.

Sakaq, guvernatori i Bankës Qendrore Andriy Pyshnyi e ka bërë të qartë se printimi i parave do të ishte një masë ekstreme dhe një masë që ata nuk planifikojnë të përdorin këtë vit.

Po ashtu Ukraina duhet të gjejë një mënyrë për të ristrukturuar rreth 20 miliardë dollarë borxhin ndërkombëtar vitin e ardhshëm pasi mbajtësit e obligacioneve sovrane ranë dakord për një ngrirje dyvjeçare të pagesave në gusht 2022.

Ministri i Financave Serhiy Marchenko ka thënë se qeveria shpresonte të siguronte financimin e huaj plotësisht në vitin 2024, por nëse lufta zgjat më shumë, atëherë “skenari do të përfshijë nevojën për t’u përshtatur me kushtet e reja”.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.