Shefi i Grupit Parlamentar të Aleancës për Ardhmërinë e Kosovës, Besnik Tahiri, ka ngritur shqetësimin për “kolaps” të ekonomisë së vogël, pas mbylljes së disa bizneseve, derisa i ka bërë thirrje qeverisë së drejtuar nga Albin Kurti, ose të veprojë për të ndaluar këtë trend negativ ose të shkojë, pra të japë dorëheqje.
Këto komente, Tahiri i ka bërë përmes një postimi në Facebook, ku ka thënë se Kosova po “përjeton një tronditje ekonomike shkak i ‘shembjes’ së bizneseve”.
“Me qindra biznese të vogla gjithandej Kosovës, duke përfshirë dyqane, biznese të vogla të shitjes, kafiteri, restorante janë duke u mbyllur për shkak të mungesës së konsumit”, shkroi ai.
“Informatat e para të tremujorit të parë të vitit 2024 rreth qarkullimit të bizneseve që operojnë në Kosovë janë alarmante”, ngriti shqetësimin Tahiri, derisa theksoi se fuqia blerëse “ka rënë nga 15 për qind deri në 50 për qind”.
“Me mbylljen e bizneseve do të shkojmë drejt rritjes së papunësisë në Kosovë që ndikon në rritjen e varfërisë dhe në uljen e nivelit të jetesës për qytetarët”.
Ekonomia, potencoi deputeti i AAK-së, përbën shtyllën kryesore të funksionimit të jetës në një shoqëri normale, mirëpo vlerësoi se qeveria aktuale nuk është duke punar në këtë drejtim, pasi që është duke u marr me tema të tjera.
“Kjo Qeveri me retorikën e vet të luftës, me konfliktin e hapur me bashkësinë ndërkombëtare duke e mbajtur Kosovën nën sanksione, dhe duke mos pasur asnjë investim të huaj të mirëfilltë në vend, është duke e bankrotuar Kosovën. Dhe, të rinjtë po detyrohen t’ia mësyjnë migrimit”, shtoi.
Në përfundim, Tahiri i bëri thirrje ekzekutivit që ose të veprojë, ose të largohet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
