Edhe zëvendëskryeministri shqiptar i Maqedonisë së Veriut befasohet me masat anti-COVID të Kosovës

Zëvendëskryeministri shqiptar i Maqedonisë së Veriut, Artan Grubi, është shprehur i befasuar me masat e reja anti-COVID të aplikuara nga Qeveria e Kosovës, sipas të cilave, për njerëzit që hyjnë në Kosovë, kërkohet dëshmia e tri apo dy dozave të vakisnës, ose testin negativ jo më të vjetër se 48 orë.

Pas telefonatës së Ministrit shqiptar të Shëndetësisë në RMV që i bëri Ministrit të Shëndetësisë së Kosovës, erdhi edhe reagimi i të dytit të ekzekutivit maqedonas,

“Vendimi i fundit i autoriteteve shëndetësore kosovare na befasoi dhe nuk e kuptoj arsyen për një masë të tillë, sepse situata shëndetësore është e njëjtë si në Kosovë dhe në Maqedoni të Veriut a po edhe në Shqipëri, ndërsa OBSH dhe vendet perëndimore po shqyrtojnë largimin e kufizimeve”, ka thënë për indeksonline.

Ai ka thënë se shpreson që qeveria kosovare t’i rikonsiderojë masat e aplikuara, ngase siç rikujton, “një nga vendimet e para të cilat kemi insistuat që të ndërmirren në Qeverinë e kaluar ka qenë të hiqen kufizimet në kufirin me Kosovës”.

“Dhe këtë e arritëm pas shumë përpjekjeve dhe takimeve me autoritetet shëndetësore në Kosovë”.

Kjo, sipas Grubit, ishte ndihmesë për qytetarët e të dyja shteteve që të lëvizin pa pengesa të natyrave kufizuese nga institucionet.

Ai gjithashtu tregoi se kanë për synim që kufiri mes dy vendeve fqinje të hiqet dhe të bëhet menaxhim i përbashkët i vendkalimeve kufitare që qarkullimi i njerëzve dhe i mallrave të jetë më i lehtë.

Ndërsa gjatë së dieles edhe Ministri shqiptar i Shëndetësisë në Maqedoninë e Veriut, Bekim Sali ka telefonuar Ministrin e Shëndetësisë së Kosovës, Rifat Latifin, për t’i shprehur brengën e qytetarëve të RMV-së që të rishqyrtojnë masat kufizuese dhe mbrojtëse ndaj COVID-19 për të hyrë në Kosovë.

“Sot, kisha një bisedë telefonike me kolegun tim nga Kosova, ministrin e Shëndetësisë, Rifat Latifi, me ç’rast diskutuam për masat e reja të Qeverisë së Republikës së Kosovës ndaj të gjithëve shtetasve të huaj që hyjnë në këtë shtet”, shkroi Sali.

“Kolegut tim ia përcollа edhe brengën e qytetarëve të Maqedonisë së Veriut, që kanë lidhje familjare, biznesore e detyrime të tjera që i lidhin me Kosovën, e të cilët kjo masë i ka kufizuar ndjeshëm”.

Për të hyrë në Kosovë është kërkuar masa e dëshmisë së marrjes së tri dozave të vaksinës anti-covid, ose testi negativ jo më i vjetër se 48 orë.

“Duke konstatuar bashkërisht se gjendja me pandeminë në të dyja vendet është gati e njëjtë, kërkova nga homologu im, Latifi, që ta rishqyrtojnë këtë vendim dhe të kërkojnë një mundësi tjetër që edhe të mbrohet shëndeti i qytetarëve të të dyja vendeve, por edhe të mos pengohet qarkullimi i tyre i lirë”, përfundoi ai.

Të premten Qeveria e Republikës së Kosovës ka miratuar masat e reja anti Covid-19.

Në faqen zyrtare të Kryeministrit, thuhet se pas një mbledhje virtuale të kabinetit Qeveritar, janë vendosur masat e reja që do hynë në fuqi nga nesër (e shtune), ku parashihet zgjatja e orës policore, duke filluar nga ora 22:00 e mbrëmjes deri në ora 05:00 të mëngjesit, ndërsa do të shkurtohet orari i gastronomisë.

“Kufizimi i qarkullimit të qytetarëve do të jetë nga ora 22:00 deri në ora 05:00, përveç rasteve të natyrës urgjente (për të kërkuar ndihmë mjekësore, blerje të barnave, për të ofruar kujdes ose ndihmë mjekësore, për të shmangur dëmtimin ose për t’i shpëtuar një rreziku lëndimi)”.

Gjithashtu, qarkullimi për personelin shëndetësor, të sigurisë dhe operatorët që kryejnë punë apo shërbime publike, “personelin e ndërrimit të natës të operatorëve ekonomikë që sigurojnë funksionimin e zinxhirit të furnizimit (përfshirë transportin e mallrave/shërbimeve), por me kusht që të pajisen me leje të veçantë nga sistemi EDI i Administratës Tatimore të Kosovës”.

Ndërsa orari në gastronomi sipas masave të reja të miratuara është shkurtuar, nga ora 22:00 në 21:00.

“Shërbimet e gastronomisë lejohet të zhvillojnë aktivitetin e tyre nga ora 05:00 deri në orën 21:00”.

“Muzika lejohet vetëm deri në orën 20:30”, thuhet në njoftim, ndërsa përgjegjësit e lokaleve duhet të sigurohen që “distanca ndërmjet klientëve në tavolina të ndryshme të jetë së paku një (1) metër”.

Të gjithë personat që hynë në Republikën e Kosovës sipas masave të reja duhet të jenë të vaksinuar së paku me 3 doza.

Çdo person i cili hyn në Republikën e Kosovës duhet të posedojë një nga dëshmitë, “certifikatën e vaksinimit me tri (3) doza (ose me një dozë të vaksinës Janssen dhe dozë përforcuese) kundër COVID-19”.

“Certifikatën e vaksinimit me dy doza (ose me një dozë të vaksinës Janssen) kundër COVID-19, bashkë me testin RT-PCR negativ për COVID-19, jo më herët se 48 orë para nisjes (për udhëtarët që hyjnë në rrugë ajrore) ose 48 orë para mbërritjes në pikën kufitare (për ata që hyjnë në rrugë tokësore)”, thuhet në njoftim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.