Aplikacione

“E kundërta e artit”: Pse janë të zemëruar ilustruesit me inteligjencën artificiale


“Një vajzë që po lexon një libër, nën qiellin e natës, atmosferë ëndërrimtare”.

Kaq mjafton të shkruhet në motorin kërkues të Deep Dream Generator Text 2 Dream dhe në më pak se një minutë, shfaqet një imazh që tregon atë që është përshkruar.

Kjo është bota e gjenerimit të imazheve të inteligjencës artificiale, ku mund të krijohen imazhe që duken si vepra arti e nivelit të lartë duke përdorur vetëm disa kërkime teksti.

Gjenerimi i imazheve prej inteligjencës artificiale duket se është kudo dhe lojtarët më të mëdhenj të kësaj sfere të re përfshijnë kompani të tilla si MidJourney, Stable Diffusion dhe Deep Dream Generator.

Ato janë të lira për t’u përdorur, deri në një pikë, duke i bërë tërheqëse për ata që thjesht duan t’i provojnë.

Nuk mund të mohohet se ato janë argëtuese, por ekzaminimi më i afërt i imazheve që prodhojnë tregon çudira. Fytyra e gruas në imazhin e kërkuar ka tipare shumë të çuditshme dhe duket se mban shumë libra.

Imazhet gjithashtu kanë një estetikë të ngjashme. Dhe, ndërkohë që ka një emocion fillestar kur shikon të shfaqet një imazh, nuk ka kënaqësi krijuese.

Implikimet e gjenerimit të imazheve të inteligjencës artificiale janë të gjera dhe mund të ndikojnë në gjithçka, nga filmat te romanet grafike dhe më shumë.

Sakaq, ilustruesit e fëmijëve kanë ngritur shqetësime rreth teknologjisë.

Midis tyre është autori dhe ilustruesi Rob Biddulph, i cili thotë se arti i krijuar nga inteligjenca artificiale “është saktësisht e kundërta e asaj që është arti”.

“Në thelb, gjithmonë kam ndjerë se arti ka të bëjë me përkthimin e diçkaje që e ndjen nga brenda në diçka që ekziston nga jashtë. Çfarëdo forme që merr, qoftë një skulpturë, një pjesë muzikore, një pjesë e shkrimit, një performancë apo një imazh, arti i vërtetë ka të bëjë me procesin krijues shumë më tepër sesa me pjesën përfundimtare. Dhe thjesht shtypja e një butoni për të krijuar një imazh nuk është një proces krijues”, ka theksuar ai.

Përtej kreativitetit, ka edhe çështje më të thella.

Një fushatë në internet – #NotoAIArt – ka parë artistë që ndajnë shqetësimet në lidhje me ligjshmërinë e gjeneruesve të imazheve dhe se si ata kanë potencialin për të zhvlerësuar aftësinë e ilustrimit.

Për të krijuar imazhe, gjeneruesit mbështeten në bazat e të dhënave tashmë ekzistuese. Këto përfshijnë miliarda imazhe që janë hequr nga interneti. Ndër më të mëdhenjtë është grupi i të dhënave me burim të hapur LAION-5B, i përdorur nga Text 2 Dream i DDG.

Kaloyan Chernev, themeluesi i DDG, ka thënë se grupi i të dhënave përbëhet nga “imazhe kryesisht të domenit publik me burim nga interneti”.

Mirëpo, shumë artistë dhe ilustrues kanë dalluar se bazat e të dhënave shpesh përfshijnë shumë imazhe me të drejtë autori.

Harry Woodgate, autor dhe ilustrues i Grandad’s Camper, ka treguar se “këto programe mbështeten tërësisht në pronën intelektuale të piratuar të artistëve të panumërt, fotografëve, ilustruesve dhe mbajtësve të tjerë të të drejtave”.

“Nuk e shikon artin dhe nuk krijon të vetën, thjesht merr mostrat e të gjithëve dhe më pas e bën diçka tjetër”, ka thënë ilustruesi tjetër Anoosha Syed.

Dhe teksa kërkesat për gjeneruesit e imazhit mund të jenë shumë të përgjithshme, ata mund të kërkojnë që një imazh të bazohet në punën e një artisti tjetër, duke mjegulluar më tej kufijtë etikë.

Sipas Syed, kjo mund të çojë në krijimin e imazheve “që qëllimisht synojnë të imitojnë stilin” e dikujt, pa pëlqimin e tij.

Po ashtu ekziston një argument që gjeneruesit nuk funksionojnë ndryshe nga njerëzit kur bëhet fjalë për t’u ndikuar nga puna e të tjerëve.

Por Biddulph është i mendimit se një artist shton emocione dhe nuanca, si dhe kujtesën kryesisht me dështimet e veta.

Syed pajtohet, duke thënë se “një njeri tjetër nuk do ta shikojë kurrë një imazh në të njëjtën mënyrë si artisti origjinal”.

Kur një artist “imiton një stil, ai është tepër i neveritshëm dhe në disa raste mund të shihet si shkelje e të drejtës së autorit…kjo është në thelb ajo që po bën arti i inteligjencës artificiale”.

Për Chernev, teksa inteligjenca artificiale vazhdon të përparojë, ekziston rreziku që mund të jetë në gjendje të sintetizojë imazhe të subjekteve të papërshtatshme ose të paligjshme bazuar në përmbajtjen ekzistuese.

Edhe pse ilustrimi i librave për fëmijë, sipas artistëve, do të mbetet kryesisht i paprekur, gjenerimi i imazheve ka potencialin të heqë dorë nga punët më të vogla në të cilat artistët e ardhshëm shpesh mbështeten për të krijuar portofol.

Ndërkohë, përdorimi në rritje i inteligjencës artificiale do të çojë gjithashtu në një zhvlerësim të punës së artistëve.

Për momentin, gjenerimi i tillë i imazheve po përdoret kryesisht për argëtim, por Chernev ka veçuar se “po i afrohet me shpejtësi një niveli të sofistikimit dhe kompleksitetit që do ta lejojë të gjenerojë imazhe shumë realiste dhe të nuancuara”.

“Jam i bindur se përmbajtja e krijuar nga inteligjenca artificiale ka potencialin që jo vetëm të përmirësojë punën e artistëve dhe stilistëve, por edhe të mundësojë krijimin e formave krejtësisht të reja të artit dhe shprehjes”, ka thënë ai.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore