Sport

E fundit: Arsenal-i kërkon shtyrjen e derbit me Tottenham-in


Arsenal-i i ka paraqitur një kërkesë Premier League-s për të shtyrë ndeshjen me Tottenham-in. Derbi i Londrës së Veriut është planifikuar të luhet këtë të diel.

“Topçinjtë” kanë një numër të paktë lojtarësh në dispozicion. Kjo për shkak të angazhimeve me kombëtaret në Afrikë, dëmtimeve, pezullimeve dhe një rast me Covid-19.

“Football.london” raporton se skuadra rivale, ajo e Tottenham-it është e befasuar nga ky vendim i Arsenal-it, duke qenë se te këta të fundit nuk ka shpërthim të infektimeve me koronavirus.

Ndërkohë, Premier League ka marrë kërkesën e Arsenal-it dhe të shtunën do të mblidhet bordi për të vendosur fatin e ndeshjes.

Arsenal-it i mungojnë Thomas Partey, Mohamed Elneny, Pierre-Emerick Aubameyang dhe Nicolas Pepe të cilët janë thirrur nga kombëtaret e tyre për Kupën e Kombeve në Afrikë.

Martin Odegaard-i është lojtari i vetëm që ka rezultuar pozitiv në testin e koronavirusit. Granit Xhaka u ndëshkua me karton të kuq në përballjen me Liverpool-in në EFL Cup dhe do të mungojë. Ndërsa, Bukayo Saka ndjeu lodhje në ndeshjen e fundit, atë përballë Liverpool-it.

/Albanianpost.com


Lajmet kryesore