Dy vite burgim për tre personat që sulmuan gazetarin Valon Syla

Gjykata Themelore në Prishtinë të enjten ka dënuar me nga dy vjet burgim tre të akuzuarit L.D, K.H dhe O.H, për veprën penale “Lëndim i lehtë trupor” për sulmin ndaj gazetarit Valon Syla më 11 prill të këtij viti.

Pas aktgjykimit dënues, Syla ka theksuar se ka qenë e rëndësishme që sulmuesit e tij të dënohen, derisa kërkesa e tij  për dëmshpërblim prej 30 mijë eurosh është refuzuar nga Gjykata.

“Për mua ka qenë e rëndësishme që ata të dënohen, që emri i tyre të figurojë si të dënuar e në të ardhmen të mos mund të bëhen pjesë e policisë, FSK-së apo institucioneve të tjera”, tha Syla.

Aktakuza ndaj të akuzuarave ishte ngritur më 4 gusht 2023 nga Prokuroria Speciale me arsyetimin se më 11 prill 2023, rreth orës 23:00, të njëjtit, të ndikuar nga ideologjitë ekstreme radikale të islamit, kishin lënduar lehtë të dëmtuarin gazetarin Syla.

Ndërkaq Asociacioni i Gazetarëve të Kosovës e kishte dënuar ashpër sulmin e rëndë fizik ndaj Sylës.

Para sulmit, ai ishte pjesë e një debati në Televizionin T7 në lidhje me gjykimin e ish-krerëve të UÇK-së në Hagë dhe ishte sulmuar pak minuta pasi që ishte larguar nga televizioni.

Ndryshe, pas sulmit ndaj Sylës, kishte pasur reagime nga shumë personalitete publike, të cilët e kishin dënuar sulmin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.