Lajme

Dy delegacione evropiane të hënën vizitojnë Kosovën


Ndërtesa e Qeverisë së Kosovës

Dy delegacione evropiane do të zhvillojnë vizitë në Republikën e Kosovës – një finlandez i kryesuar nga ministrja për çështje evropiane të Finlandës, Tytti Tuppurainen dhe një irlandez nga ministri për çështje evropiane të Irlandës, Thomas Byrne.

Delegacionet do të priten nga zv/kryeministri i parë për integrim evropian, Besnik Bislimi, ku edhe më pas do të ketë konferencë të përbashkët për media, siç njoftoi Zyra e Kryeministrit.

Tuppurainen e cila paraprakisht u prononcua për agjencinë e lajmeve “kosovapress” tha se është vizita e saj e parë në Kosovë, për çka u shpreh edhe për partneritetin e gjatë bilateral mes Kosovës dhe Finlandës.

“Besoj se kemi kaq shumë për të bërë në fushën e ekonomisë apo asaj qarkore, riciklimit, e kështu me rradhë. Mezi pres të rrisim bashkëpunimin tonë”, u shprej ministrja finlandeze.

Mes tjerash, ministrja u shpreh e bindur se është momenti më i duhur që Kosovës t’i hiqet regjimi i vizave që ia pamundëson lëvizjen e lirë qytetarëve brenda kontinentit evropian, për çka edhe u shpreh se Finlanda është ithtare e një gëje të tillë.

Kosovarët, dhe rinia e Kosovës e meritojnë të lëvizin lirshëm, tha ajo.

Mes tjerash, ministrja vuri theksin edhe te dialogu Kosovë-Serbi i fascilituar nga Bashkimi Evropian, dhe nevojën që çështjet e pazgjidhura të tejkalohet për të progresuar tutje drejt rrugës evropiane.

Finlanda është njëra nga shtetet e cila e ka njohur Kosovën me të shpallur pavarësinë, përkatësisht në fillim të marsin të vitit 2008, dhe kanë themeluar marrëdhëniet diplomatike qysh në shkurt të vitit 2009; ndërsa ish-presidenti finlandez, Marti Ahtisaari kishte rol kyç në negociatat për statusin e Kosovës që kulmoi me pavarësi.

Njëashtu edhe marrëdhëniet Kosovë-Irlandë janë themeluar qysh në fund të shkurtit të vitit 2008 pas shpalljes së pavarësisë dhe janë kultivuar kryesisht marrëdhënie të ngrohta bilaterale.

Kryeministri i Kosovës, Albin Kurti, muajin e kaluar priti në takim ambasadorin jorezident irlandez, Ronan Gargan.

Në komunikatën e publikuar për media, u bë e ditur se temë diskutimi kanë qenë çështjet ekonomike si dhe diskutime të fushës së sigurisë.

Irlanda tani mban Presidencën e Këshillit të Evropës dhe kryeministri Kurti theksoi mbështetjen që i duhet Kosovës për anëtarësim të suksesshëm në këtë organizatë të rëndësishme për promovimin e të drejtave të njeriut, lirisë dhe demokracisë në kontinent.

/Albanianpost.com


Lajmet kryesore