Dumani nënshkruan Memorandum Mirëkuptimi me Drejtorin e Agjencisë britanike kundër Krimit

Kreu i Prokurorisë së Posaçme SPAK, Altin Dumani, ka nënshkruar një Memorandum Mirëkuptimi me Drejtorin e Përgjithshëm të Agjencisë Kombëtare kundër Krimit (NCA), Graeme Biggar, të Mbretërisë së Bashkuar.

Memorandumi shënon një tjetër hap të rëndësishëm të SPAK, drejt forcimit të luftës kundër korrupsionit dhe krimit të organizuar brenda dhe jashtë vendit.

Po ashtu akti është një moment historik për të dy institucionet, pasi është marrëveshja e parë që NCA nënshkruan më një strukturë hetimore në Shqipëri.

Qëllimi kryesor i memorandumit është të institucionalizojë partneritetin e suksesshëm tashmë të vendosur midis SPAK dhe NCA, në përpjekjen e përbashkët për të luftuar krimin e organizuar, pastrimin e parave dhe korrupsionin e zyrtarëve të lartë publik.

“Ky bashkëpunim thellohet dhe bëhet më i qëndrueshëm përmes këtij memorandumi, i cili do të ndihmojë në përshpejtimin e shkëmbimit të informacionit dhe përvojave më të mira në fushën e drejtësisë penale”.

Ndërkohë, memorandumi parashikon një angazhim të vazhdueshëm të dy palëve për të forcuar bashkëpunimin midis tyre por dhe për të lehtësuar marrëdhëniet me agjencitë e tjera ligjzbatuese në rritjen e luftës kundër krimit të organizuar ndërkombëtar.

Përfaqësuesit e të dy institucioneve shprehën besimin e tyre të thellë, se bashkëpunimi i ngushtë midis tyre do të sjellë rezultate konkrete në goditjen e disa prej veprimtarive më të rëndësishme të grupeve kriminale shqiptare në Mbretërinë e Bashkuar dhe në Shqipëri, kryesisht në trafikun e narkotikëve, trafikimin e qenieve njerëzore, trafikimin e armëve të zjarrit dhe pastrimin e parave.

“Forcimi i marrëdhënieve të SPAK me NCA në luftën kundër korrupsionit dhe krimit të organizuar, ka një ndikim të drejtpërdrejtë në sigurinë dhe stabilitetin e shtetit ligjor në Shqipëri, Mbretërinë e Bashkuar dhe në të gjithë Bashkimi Evropian”.

Të dyja palët, shprehën gatishmërinë e hedhjes së menjëhershme të hapave konkret në hetimin e çështjeve dhe zhvillimin e bashkëpunimit, duke përfshirë këtu edhe në aspekte të tjera që lidhen me strategjitë më të avancuara të hetimit financiar.

Edhe Ministri i Brendshëm, Taulant Balla, është takuar më herët me Biggar, duke treguar se takimi mes tyre bëhet në kuadër të operacioneve të përbashkëta.

Operacione këto, në luftën kundër krimit të organizuar, mbështetjen teknike dhe ekspertizën për Policinë e Shtetit dhe vetëpastrimin e saj.

Në muajin shtator të vitit të kaluar, agjencia britanike NCA ka zbuluar se grupet kriminale të Ballkanit Perëndimor kanë marrë nën kontroll më shumë tregje të kokainës dhe kanabisit në vend.

Bëhet fjalë për afro 120 tonë kokainë dhe 40 tonë heroinë, të cilat konsumohen çdo vit në MB, pohoi Biggar.

“Përdorimi i paligjshëm i drogës mbetet shtytësi kryesor i krimit të rëndë dhe të organizuar, dhe është i lidhur me armët e zjarrit, dhunën serioze, skllavërinë moderne, vjedhjet dhe grabitjet, dhe pastrimin e parave. Konfiskimet e drogës, brenda Britanisë së Madhe, në kufi dhe jashtë shtetit, janë në nivelet më të larta historike, por oferta ka rezultuar elastike, duke reflektuar fitimet që duhen bërë”, theksoi Biggar.

Që nga themelimi i saj në vitin 2013, NCA-ja ka ekzistuar për të përmbushur dy funksione: të reduktojë krimin, si nëpërmjet hetimeve të veta, ashtu edhe duke koordinuar, mundësuar dhe udhëhequr punën e të gjithë partnerëve të zbatimit të ligjit.

E dyta është një funksion i ‘inteligjencës kriminale’, i përdorur për të mbledhur, analizuar dhe shpërndarë informacione të inteligjencës, duke përfshirë bërjen e vlerësimeve dhe sigurimin që Britania e kupton plotësisht shkallën e kërcënimit nga krimi i rëndë dhe i organizuar dhe se si po ndryshon.

Në mbështetje të funksionit të dytë, NCA-ja publikoi Vlerësimin Strategjik Kombëtar të Krimit të Rënda dhe të Organizuar për vitin 2023.

Vlerësimi bazohet në inteligjencën e analizës nga të gjitha organet e zbatimit të ligjit dhe organizatat partnere në qeveri, sektorin privat, akademinë dhe shoqërinë civile.

Raporti përshkruan kërcënimin ndaj Mbretërisë së Bashkuar nga krimi i rëndë dhe i organizuar dhe se si ai vazhdon të zhvillohet dhe në disa fusha të rritet.

Vlerësimi rendit disa nga kërcënimet kryesore me të cilat përballet MB sot, duke përfshirë: Krimin e Organizuar të Emigracionit; Përdorimin e paligjshëm të drogës; Përdorimin e armëve të zjarrit; Abuzimin seksual të fëmijëve; Mashtrimin; Ransomware dhe Pastrimin e parave.

Biggar përfundoi fjalimin e tij duke deklaruar se teknologjia duhet të drejtojë reagimin e NCA-s ndaj krimit të rëndë dhe të organizuar.

Kjo do të thotë se nevojiten dy ndryshime thelbësore. Zbatimi i ligjit, duke përfshirë NCA-n, duhet të bëjë më shumë për të qenë në avantazhin e teknologjisë së re: kjo do të kërkojë vizion kolektiv dhe investime të qëndrueshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.