“Duam që Rusia të vijë”, thonë protestuesit moldavë

Para ndërtesës së lartë të parlamentit të Moldavisë, mijëra njerëz u mblodhën nga i gjithë vendi, secili me historinë e vet të varfërisë dhe zhgënjimit.

“Qeveria po tallet me ne”, ka thënë Ala. “Ka njerëz me katër ose pesë fëmijë që fjalë për fjalë nuk kanë asgjë për të ngrënë”.

Sipas presidentit të Moldavisë, faturat e tanishme të energjisë konsumojnë më shumë se 70 për qind të të ardhurave të familjeve në vend.

Ala ka treguar se këto fatura i gëlltisin gjysmën e pensionit.

“Kur e zgjodhëm këtë qeveri na premtuan rritje të pagave dhe pensioneve, por deri më tani nuk kemi parë asnjë qindarkë”, ka thënë ajo.

Protestat, të organizuara nga partia pro-ruse e Moldavisë Sor, po ndiqen nga afër nga qeveritë në të gjithë Evropën dhe më gjerë.

Shumica e protestuesve udhëtuan për në kryeqytetin Kishinau me autobus dhe thuhet se shpenzimet e tyre mbulohen nga partia.

Ditë përpara se të mbahej tubimi, presidentja Maia Sandu paralajmëroi se Rusia po planifikonte të dërgonte diversantë të trajnuar ushtarakë në vend, të maskuar si civilë, për të rrëzuar qeverinë e saj pro-perëndimore.

Por Rusia ka thënë se akuza është një përpjekje e autoriteteve moldave për të shkëputur vëmendjen nga dështimet e tyre sociale dhe ekonomike.

Moldavia, e vendosur strategjikisht në kufirin me Ukrainën, dhe që strehon rajonin e saj separatist pro-rus, varet nga gazi rus.

Vitin e kaluar, Moska përgjysmoi furnizimin me Moldavinë, duke ushtruar presion mbi qeverinë në Kishinau, pasi ajo kërkon të mbajë së bashku popullsinë e saj rumune dhe rusisht-folëse.

Protestat për rritjen e çmimit të gazit dhe energjisë elektrike nisën vjeshtën e kaluar.

Në një konferencë publike të hënën e kaluar, presidentja Sandu ka thënë se Rusia tashmë kishte tentuar të destabilizonte situatën në Moldavi nëpërmjet krizës energjetike.

Dhe kjo e fundit sipas saj, “pritej të shkaktonte pakënaqësi të madhe në mesin e popullatës dhe të çonte në protesta të dhunshme”.

Plani tani, ka vijuar ajo, përfshin “diversantë me stërvitje ushtarake, të cilët do të ndërmerrnin veprime të dhunshme, do të kryenin sulme mbi ndërtesat e institucioneve shtetërore apo edhe do të merrnin pengje”.

57 personave nga kombet miqësore me Rusinë – duke përfshirë një grup tifozësh serbë të futbollit dhe disa boksierë nga Mali i Zi – iu refuzua hyrja në Moldavi në ditët e fundit, pas kontrolleve nga shërbimet e sigurisë.

Po ashtu hapësira ajrore e Moldavisë u mbyll papritur për disa orë këtë javë.

“Është shumë e qartë se Rusia është një shtet agresor”, ka theksuar Rosian Vasiloi, kreu i policisë kufitare të Moldavisë.

Sipas tij, kërcënimi kishte ekzistuar që nga 24 shkurti, kur filloi lufta në Ukrainë, por se “tani është ndryshe, një përzierje e kërcënimeve nga brenda dhe jashtë Moldavisë”.

Për sa kohë që Ukraina vazhdon të luftojë, ai beson se rreziqet për Moldavinë janë më të ulëta. “Nëse Ukraina bie, Moldavisë i vjen radha. Por nuk kam frikë”.

Që nga fillimi i luftës, qeveria e Sandu-së është përpjekur të diversifikojë burimet e energjisë të vendit dhe ta largojë atë nga varësia nga gazi rus.

Por sulmet ndaj infrastrukturës së Ukrainës dhe kostoja e importit të energjisë elektrike nga Rumania nuk e kanë bërë aq të lehtë.

Ajo ka thënë se komploti i supozuar rus do të mbështetet në “forcat e brendshme” si partia opozitare Sor, dhe ka bërë thirrje që parlamenti të miratojë ligje më të ashpra sigurie.

Marina Tauber, sekretarja e përgjithshme e Sor, e cila drejtoi protestën jashtë parlamentit, ka thënë se partia e saj nuk është kundër BE-së dhe dëshiron marrëdhënie të mira me të gjitha palët.

Por ka nga ata në partinë e saj që pranojnë se do të mirëprisnin ndërhyrjen ruse.

Sakaq, shumë njerëz në Kishinau i shohin lidhjet më të ngushta me Perëndimin si një mënyrë për të siguruar pavarësinë dhe demokracinë e Moldavisë në një kohë kritike.

Partia e Sandu-së ka një shumicë solide në parlament.

Por pamja nga turma jashtë parlamentit të dielën ishte e ndryshme dhe ekziston rreziku që presioni mund të zgjerojë ndarjet në shoqërinë e larmishme të Moldavisë.

Rreziku është i qartë kur Ala dhe miqtë e saj u pyetën nëse besojnë se Rusia dëshiron të depërtojë në Moldavi, siç frikësohet presidentja e tyre.

“Po, le të vijnë. Ne duam që ata të vijnë këtu. Ne duam të jemi pjesë e Rusisë”.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.