Shqipëria

Dua ‘mezi po pret’ koncertin e Pavarësisë


Kremtimi i 110-vjetorit të Pavarësisë së Shqipërisë nuk mund të mbyllej më mirë se sa me një koncert në sheshin Skënderbej nga artistja shqiptare me famë botërore, Dua Lipa, e cila së fundmi ka marrë edhe shtetësinë shqiptare.

Vetë muzikantja e vendosur në Britaninë e Madhe, pak orë përpara koncertit të organizuar, i cili mbyll edhe turin e saj për albumin me sukses ndërkombëtar, Future Nostalgia, shkruan në media sociale se “mezi po pret të shohë publikun shqiptar”.

“Jam kaq e lumtur që jam në Tiranë”, bën me dije Dua, duke shtuar edhe prapashtesën “si qytetarja më e re”, për të kënduar në skenë natën e sotme.

“Është spektakli i fundit i ‘Future Nostalgia’. Mezi po pres me ju pa!”.

Dua Lipa merr shtetësinë shqiptare

Presidenti i Republikës, Bajram Begaj, i ka dhënë shtetësinë shqiptare këngëtares me famë botërore, Dua Lipa, vetëm një ditë përpara 110-vjetorit të Pavarësisë dhe koncertit të saj, i cili do të mbahet në Tiranë.

Kreu i Shtetit, e ka pritur artisten shqiptare, së bashku me familjen e saj, për ta nderuar për kontributin që ajo jep si ambasadore botërore e vendit, përmes artit të saj.

“Është kënaqësi e veçantë që sot presim artisten e madhe Dua Lipa. Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë.”, përmendi Begaj në fjalën e tij, gjatë ceremonisë.

Po ashtu, ai i bëri me dije muzikantes se rinia shqiptare e ka shembull atë dhe se vetë puna e saj, është tregues se ëndrrat mund të arrihen.

“Ti i ke bërë të gjithë shqiptarët bashkë! Ndaj kam kënaqësinë t’ju jap shtetësinë shqiptare”, shtoi Presidenti i Republikës.

Një yll i muzikës botërore tashmë, Dua Lipa lindi në Londër në 22 gusht 1995 në një familje shqiptare nga Kosova. Ajo u shkollua mes Londrës dhe Prishtinës, ku familja e saj u vendos pas shpalljes së pavarësisë së Kosovës në vitin 2008.

Talenti i lindur dhe përkushtimi për botën e muzikës dhe artit e ndihmoi të ngjiste me guxim dhe vendosmëri shkallët e karrierës artistike që në moshë të re.

Tashmë ajo numëron shumë çmime e vlerësime për kontributin e saj në muzikë dhe art, përfshi këtu edhe tre çmime Grammy.

Ndjeshmëria e saj për çështjet sociale në vende të ndryshme të botës e ka angazhuar Dua Lipën pranë UNICEF-it, në mbështetje të fushatave për të drejtat e fëmijëve.

Pas tërmetit të 26 nëntorit të vitit 2019 në Shqipëri, Lipa u kërkoi adhuruesve të saj mbështetje dhe donacione si dhe organizoi një fushatë të mbledhjeve të fondeve bashkë me stilistë shqiptarë, të ardhurat e të cilës shkuan për familjet e viktimave të tërmetit.

/Albanianpost.com


Lajmet kryesore