Drita mposht Drenicën dhe rimerr kreun e tabelës, Dukagjini fiton ndaj Ferizajt

Ka përfunduar xhiroja e 27-të e Albi Mall Superligës së Kosovës në futboll.

Drita e ka marrë përsëri vendin e parë në tabelë, teksa në ndeshjen e sotme arkëtoi tre pikë, duke e mposhtur Drenicën me rezultat 3:0.

Pjesa e parë e kësaj ndeshje nuk prodhoi gola, por një karton të kuq, kur futbollisti i Drenicës, Agim Zeka, u përjashtua nga loja në minutën e 38-të.

Sigurisht, me një lojtar më shumë në fushë, vendasit e patën më të lehtë për ta fituar ndeshjen.

Serinë e golave e hapi Leonat Vitija duke shënuar në minutën e 57-të të ndeshjes.

Në minutën e 75-të, Kastriot Selmani e dyfishoi epërsinë e gjilanasve, derisa katër minuta më vonë shënoi edhe Muharrem Jashari për 3:0, që doli të jetë goli i fundit në ndeshje.

Me këtë sukses, Drita tani mban vendin e parë në tabelë me 55 pikë, një më shumë se Ballkani i vendit të dytë.

Ndërsa Drenica zhytet edhe më thellë në vendin e fundit me 23 pikë, që misionin për mbijetesë do ta ketë tejet të vështirë.

Në ndeshjen tjetër, Dukagjini e ka mposhtur Ferizajn me rezultat 3:1.

Mysafirët e nisën më mirë ndeshjen, duke kaluar në epërsi vetëm pas shtatë minutash lojë me golin e Behar Bardhit.

Por, gëzimi i tyre zgjati vetëm tre minuta, kur Dukagjini i barazoi shifrat me golin e Vitor Hufos.

Pjesa e parë përfundoi me rezultat të barabrartë, derisa golin e epërsisë për skuadrën nga Klina e shënoi Marclei Santos në minutën e 60-të.

Dukagjini e shënoi edhe golin e tretë me anë të Otto John, që realizoi në minutën e 76-të.

Me këtë fitore, Dukagjini gjendet në vendin e tretë me 35 pikë, ndërsa Ferizaj në të parafundit me 28 sosh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.