Drejtoria e Arsimit e suspendon për 6 muaj profesorin që sulmoi seksualisht nxënësen në Deçan

Drejtoria e Arsimit në Komunën e Deçanit ka marrë vendim që profesori i shkollës “Lidhja e Prizrenit”, Valentin Selmanaj të suspendohet për gjashtë muaj.

Kështu ka thënë për Albanian Post, drejtori i Drejtorisë së Arsimit në këtë komunë, Besnik Hulaj.

“Si drejtori e arsimit kemi marrë masa, e kemi suspenduar për 6 muaj. Ai është në paraburgim, organet e drejtësisë janë duke u marrë me rastin në fjalë”, ka treguar ai.

Profesori i edukatës fizike, Valentin Selmanaj, u kap duke sulmuar seksualisht një nxënëse të shkollës e cila po vijonte mësimin në klasën e shtatë.

“Sjelljet i kishte të mira në shkollë, nuk ka pasur ankesa më parë për të. Askush nuk është ankuar, së paku ne si drejtori nuk jemi të informuar për asnjë ankesë, por rasti si rast na ka shokuar të gjithëve”, ka treguar drejtori Hulaj.

Prokuroria Themelore në Pejë i ka vënë masën e sigurisë për 48 orë dhe është duke e shqyrtuar kërkesën e paraburgimit.

Zëdhënësi i prokurorisë, Shpëtim Nikçi, ka thënë për AP se atij i është sekuestruar edhe telefoni.

“Ai është ndaluar për 48 orë”, ka bërë të ditur zëdhënësi i Prokurorisë Themelore në Pejë, Shkodran Nikçi në një prononcim për Albanian Post.

“Telefoni i është sekuestruar dhe aktualisht është duke u bërë kërkesa për paraburgim”, ka treguar më tej ai.

“Prokurori i shteti ka marrë veprime hetimore për ndriçimin e plotë të kësaj çështje penale, i cili ka shkuar në stacionin policor dhe ka urdhëruar sekuestrimin e telefonit të pandehurit”, ka sqaruar Nikçi për Albanian Post.

Prokurori e ka cilësuar rastin si “sulm Seksual”.

Raportohet se ngjarja ka ndodhur të premten, teksa është filmuar me telefon, fshehurazi përmes derës së klasës.

Në një video e cila është publikuar mbrëmë nga telegraf, mësimdhënësi shihet duke e puthur vajzën e mitur.

Kryetari i Komunës së Deçanit, Bashkim Ramosaj, ka thënë se ky rast ka tronditur të gjithë.

“Është një rast që na ka tronditur, për shkak të respektit që e kanë pasur banorët për atë mësimdhënës, dhe nuk e di çka ka mundur t’i ndodhë. Mirëpo është rast që na ka tronditur të gjithëve”, ka thënë Ramosaj.

Sulmoi seksualisht nxënësen, profesori ndalet për 48 orë në paraburgim – i sekuestrohet telefoni

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.