Dogana e Kosovës: Petkoviç gënjeu, konfiskuam 42 mijë litra venë të prodhuara në mënyrë jo-legjitime
Dogana e Kosovës përmes një reagimi për media i ka mohuar akuzat qesharake të drejtorit të ashtuquajturës “Zyrë për Kosovën” në qeverinë e Serbisë, Petar Petkoviç, se rreth 40 mijë litra verë janë konfiskuar nga Policia e Kosovës në fshatin Hoçë e Madhe, komuna e Rahovecit.
“Gjatë ditës së djeshme disa media kanë cituar njoftime me pretendime të rrejshme të një zyrtari të Qeverisë së Serbisë për gjoja veprime të njëanshme të Doganës së Kosovës me konfiskim të pijeve alkoholike, të prodhuara në mënyrë jo-legjitime”, thuhet në reagim.
Sipas njoftimit, zyrtarët e Doganës kanë gjetur se përveç dyqanit personi përgjegjës operon edhe me veprimtarinë e prodhimit të pijeve alkoolike pa autorizim nga Dogana e Kosovës.
“Gjatë kontrollit janë hasur produkte të gatshme me përmbajtje alkooli në sasi prej rreth 42 mijë litra. Personi në fjalë ka vepruar krejtësisht në shpërfillje të rregullimit ligjor dhe ka bërë dëm buxhetit në vlerë prej rreth 38 mijë euro vetëm për pjesën e detyrimeve për stokun e hasur gjatë kontrollit”.
Po ashtu në njoftim theksohet se veprimi i bizneseve të paligjshme përbën konkurrencë të padrejtë ndaj bizneseve të ligjshme.
“Tërheqja e mallit të ndalur përkohësisht kërkon kohë derisa të vendosen mallrat në mjete të përshtatshme transporti. Dogana e Kosovës është institucion profesional i zbatimit të ligjit dhe trajton në mënyrë të barabartë të gjithë qytetarët e Republikës së Kosovës”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
