Djegia e monumentit kulturor në Mitrovicë, Çeku: Barbarë janë ata që djegin historinë e tyre – do restaurohet

“Barbarë janë ata që e djegin kulturën dhe historinë e tyre”, ka thënë Ministri i Kulturës, Rinisë dhe Sportit, Hajrulla Çeku, pas djegies së shtëpisë më të vjetër në qytetin e Mitrovicës.

Përmes një postimi në llogarinë në Facebook, Çeku ka thënë se pas një rezistence të madhe nga familja dhe një tentim rrënimi së fundmi, “dje patën filluar ndërhyrjet për shpëtimin e shtëpisë së familjes Koroglu në Mitrovicë”.

“Pasi e kuptuan që nuk zmbrapsemi nga detyrimi ynë për mbrojtjen e trashëgimisë kulturore, qyqarët në mënyrë tinëzare pasi ra terri ia vunë flakën shtëpisë së shekullit XIX”, shkroi Çeku.

Por, përkundër kësaj, ministri Çeku theksoi se “nuk do t’ia dalin”, pasi që bënë me dije se “shtëpia do të restaurohet”.

“Dhe do t’i përdorim të gjitha mundësitë ligjore që faturën e restaurimit ta paguajnë ata që ia vunë flakën”, paralajmëroi.

Çeku pohoi se pret që ata që e bënë këtë akt, të cilët i quajti “kriminelë”, të kapen dhe të ndëshkohen, teksa shtoi se “prokuroritë dhe gjykatat tona kanë rol qendror në mbrojtjen e trashëgimisë kulturore”.

“Dënimet e deritanishme me gjobë nga 200 deri 700 euro për dëmtim të monumenteve, kur kodi penal parasheh deri në 500 mijë euro e burgim efektiv, janë vetëm inkurajim për keqbërësit”, beson.

Në fund të reagimit të tij, ministri Çeku theksoi se “betejën mes barbarizmit dhe kulturës pa dyshim se do ta fitojë kultura”.

I vihet flaka monumentit kulturor në Mitrovicë, dyshohet se ishte zjarrvënje e qëllimshme – ministria akoma pa reagim

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.