Dita Ndërkombëtare e Monumenteve – “reflektim mbi dëmet nga ndryshimet klimatike”

18 prilli 2022 shënon Ditën Ndërkombëtare të Monumenteve dhe Siteve. Por, këtë vit, ajo i dedikohet edhe mbrojtjes së klimës.

“Një ditë për të reflektuar mbi dëmet që mund t’u shkaktoheshin monumenteve për shkak të ndryshimeve klimatike”, ka shkruar ministrja e Kulturës së Shqipërisë, Elva Margariti, në median sociale “Facebook”.

“Fati i tyre”, vijon ajo, shkruan Albanian Post, “varet vetëm nga sjellja jonë karshi natyrës”.

Ndër të tjera, Margariti njofton se sot, në çdo park arkeologjik, hyrja është e lirë për të gjithë vizitorët dhe të interesuarit.

Sakaq, ministrja ka ndarë edhe lajmin për restaurimin e Kishës së Shën Marisë, në ishullin Maligrad dhe rehabilitimin e shtegut panoramik.

“Një prej pasurive më të rëndësishme në rajonin e Prespës, për vlerat e trashëgimisë kulturore dhe asaj natyrore”, ka përmbyllur ajo.

“Trashëgimia kulturore dhe klima”

Në vitin 1982, Këshilli Ndërkombëtar për Monumentet dhe Vendet (ICOMOS) përcaktoi 18 Prillin si Ditën Ndërkombëtare të Monumenteve dhe Siteve Kulturore, e cila u pasua nga miratimi i UNESCO-s gjatë Konferencës së Përgjithshme të 22-të.

Çdo vit, me këtë rast, ICOMOS propozon një temë për aktivitetet që do të mbahen nga anëtarët e tij.

Duke u mbështetur në temën e vitit të kaluar “Të kaluara komplekse: të ardhme të ndryshme”.

Për vitin 2022, ICOMOS ka vendosur temën “Trashëgimia kulturore dhe klima”, rreth së cilës anëtarët e saj mund të zhvillojnë një dialog të hapur e konstruktiv mes brezave të ndryshëm.

Në vitin 2020, ICOMOS shpalli iniciativën Trashëgimia Kulturore dhe Emergjenca Klimatike, duke njohur potencialin e trashëgimisë kulturore, që bën të mundur një veprim gjithëpërfshirës, transformues dhe të drejtë në fushën e klimës.

Raporti i “E ardhmja e të kaluarës sonë”, i botuar nga ICOMOS në 2019, mbështeti gjithashtu solidaritetin midis profesionistëve të trashëgimisë kulturore dhe atyre komuniteteve që ishin më të prekura ose më pak të afta për të përballuar koston e ndryshimeve klimatike.

Solidariteti duhet të përbëjë bazën e veprimeve që ne ndërmarrim në këtë dekadë, në rrugën tonë, drejt një Drejtësie e Barazie përballë Ndryshimeve Klimatike dhe arritjes së Objektivave të Zhvillimit të Qëndrueshëm( SDG).

Drejtësia e Barazia përballë Ndryshimeve Klimatike janë elementë qendrorë në diskutimin e vazhdueshëm në lidhje me atë pjesë ku ndryshimi i klimës kryqëzohet me trashëgiminë kulturore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.