Disa përdoruesve të TikTok-ut – përfshirë Russell Brand – u është dhënë ‘status i veçantë’

Platforma TikTok u ka dhënë status të veçantë disa llogarive të profilit të lartë, me moderatorët në Evropë të inkurajuar që të jenë më të butë me përmbajtjen e postuar nga njerëz duke përfshirë Russell Brand.

Ndërkohë kërkesa për të qenë më pak e rreptë është theksuar edhe në takimet me moderatorët.

Dokumentet sugjerojnë se stafi ka krijuar një hierarki përdoruesish, me individë ose grupe të caktuara që u lejojnë atyre më shumë liri veprimi.

Disa llogarive në dukje të rëndësishme u janë dhënë etiketa të brendshme, të cilat duket se nuk shfaqen në llogari të tjera.

Etiketat që tregojnë një status të ngritur përfshijnë “super llogari”, “super llogaria e super llogarisë” ose “krijuesi kryesor”.

Ky i fundit përdoret si një term ombrellë për këto emërtime, megjithëse në disa raste përdoret gjithashtu si një etiketë në nivel përdoruesi për një llogari individuale.

TikTok-u ndërkaq këmbëngul se kjo nuk është politikë e kompanisë. Dhe se ishte e pasaktë të thuhej se stafit i ishte kërkuar të ishte më pak i rreptë me disa llogari.

Po ashtu thekson se udhëzimet zbatohen për të gjithë ata që përdorin aplikacionin.

Britanikja The Guardian ka hetuar TikTok-un mes shqetësimeve të vazhdueshme se si moderon më shumë se 1 miliard përdoruesit e tij në mbarë botën.

Gjithashtu ka parë komunikime të brendshme që ka të ngjarë të ngrenë pyetje të reja rreth mënyrës sesi kontrollohet aplikacioni.

Sipas mesazheve, moderatorëve përgjegjës për policimin e mijëra postimeve në ditë në të gjithë Evropën, Lindjen e Mesme dhe Afrikë u është kërkuar të ndjekin atë që duket të jetë këshilla joformale kur bëhet fjalë për krijuesit kryesorë, duke lënë mënjanë udhëzimet zyrtare të TikTok-ut.

The Guardian i është thënë se etiketa kryesore e krijuesit nuk shfaqet në Opus, një portal masiv që përfshin një grup zyrtar udhëzimesh që supozohet të ndiqen nga moderatorët e TikTok-ut.

Në vend të kësaj, etiketa duket se përdoret nga këshilltarët, të cilët përdorin termin ombrellë të krijuesit kryesor në bisedat e brendshme për të përshkruar përdorues të caktuar.

​ Sipas komunikimeve të brendshme të parë nga The Guardian, moderatorëve u është thënë që t’i trajtojnë llogaritë që mbajnë ato etiketa më butësisht sesa ato të përdoruesve të tjerë.

Në një mesazh të dërguar nga një këshilltar për një grup prej më shumë se 70 moderatorësh nën titullin që përfshinte fjalët “krijuesit kryesorë”, këshilla ishte të jesh “më i butë” në ato që përshkruheshin si “raste të skajshme”.

Dhe ky term duket se i referohet videove që konsiderohen në kufirin e shkeljes së udhëzimeve të TikTok-ut.

Ai gjithashtu shfaqet në software-in që drejton sistemin zyrtar të ankesave për përmbajtjen, i cili quhet Rock.

Llogaritë me emërtime të veçanta përfshijnë një të krijuar nga Brand, aktori dhe komediani që po përballet me pretendime të shumta për sjellje të pahijshme seksuale.

Të tjerë përfshijnë ato të Manchester United, yllin e popit Sam Smith dhe YouTuber Ethan Payne.

Sakaq, nuk ka asnjë sugjerim që individët janë të vetëdijshëm për etiketat e aplikuara për ta.

Kërkesa për moderatorët duket se sfidon vetë udhëzimet e TikTok-ut, të cilat thonë se rregullat e tij duhet të zbatohen për të gjithë në platformë.

Një zëdhënës i TikTok-ut ka thënë se “këto  pretendime në lidhje me politikat e TikTok-ut janë të gabuara ose të bazuara në keqkuptime, ndërsa The Guardian nuk na ka dhënë informacion të mjaftueshëm në lidhje me pretendimet e tjera për t’u hetuar”.

Sipas tij, udhëzimet e komunitetit zbatohen në mënyrë të barabartë për të gjitha përmbajtjet në TikTok.

Kohët e fundit, moderatorët e TikTok-ut iu referuan gjithashtu një mjeti të brendshëm të quajtur Lighthouse, i cili ruan informacione rreth përdoruesve.

Mjeti është i aksesueshëm në një faqe interneti të brendshme të organizuar nga ByteDance, pronari i TikTok-ut.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.