Digjitalizimi i shërbimeve nuk “u shërben” të gjithëve në Shqipëri

Duke nisur nga 1 maji, qytetarët shqiptarë duhet të përdornin portalin e shërbimeve elektronike “e-Albania” për të marrë shumicën dërrmuese të shërbimeve publike.

Revolucioni digjital u paralajmërua qysh në krye të herës nga ana e autoriteteve shqiptare, duke i dhënë fund, sipas tyre, korrupsionit nëpër sportele.

Por, dy javë më pas, shërbimet “e digjitalizuara” nuk po u shërbejnë të gjithëve, për më tepër shtetasve të huaj – në këtë rast shtetasve kosovarë.

Më saktësisht, një biznesmen kosovar, i cili nuk zotëron një leje qëndrimi dhe nuk figuron në regjistrat elektronikë, nuk mund të regjistrojë në sistem biznesin e tij.

Edhe vetë institucionet duket se janë kapur të papërgatitura për situata të tilla, që nuk parashikoheshin nga “mbyllja e sporteleve”.

E vetmja fjali sqaruese që gjenerohet nga faqet zyrtare është ajo e Drejtorisë së Përgjithshme të Tatimeve.

“Nëse nuk jeni nënshtetas Shqiptar, duhet të drejtoheni në zyrën më të afërt tatimore për t’u regjistruar!”, lexohet në faqen e këtij institucioni.

Në faqen e tatimeve, gjendet praktika e help deskut, e cila nuk ka asgjë rreth regjistrimeve, ndërsa informacioni për shtetasit e huaj nuk vihet në dispozicion.

Një burim zyrtar për Albanian Post nga njëra prej Drejtorive Rajonale të Tatimeve pohoi se “nuk kemi asnjë udhëzim se si do të duhet të procedohet me shtetasit e huaj”.

Qendra Kombëtare e Biznesit, nga ana e saj, informon se personi duhet t’i drejtohet info deskut, një praktikë që, sërish, nuk shteron asgjë nga kërkesat në fjalë.

Sakaq, QKB-ja paraqet një formular për të cilën ende nuk ka një përgjigje.

Kujtojmë që, në të gjithë Shqipërinë do të jenë 150 zyra të gjendjes civile, të cilat do të ofrojnë shërbime për qytetarët nga 390 që janë aktualisht.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.