Dëshmitari i shtatë: Sabit Geci nuk e ka goditur askënd për shkak të gjendjes së tij shëndetësore

Dëshmitari i shtatë i mbrojtur i Zyrës së Prokurorisë së Specializuar (ZPS) ndaj Pjetër Shalës, në seancën gjyqësore të mërkurës ka folur për Sabit Gecin, për të cilin ka deklaruar se në shtabin në Kukës e kanë quajtur “Qopa”.

Ai gjatë marrjes në pyetje nga ZPS-ja tha se, “Sabit Gecin e njihte nga viti 1991” dhe e dinte se ishte invalid pasi ishte plagosur nga forca serbe nga helikopteri.

“Kam harruar se kem pas shumë raste nuk kam qejf me cek emra që përzihen, emra pa nevojë se 500 herë kena pas rrahje, e me emra po i harroj pak”.

“Atë ditë kur na kanë rrahur me shuplakë se na kanë detyruar me sjell njëri-tjetrin atë ditë ka qenë Sabiti aty, por për këta tjerët kam harru edhe kush ka qenë. Po Sabiti nuk e ka goditur askënd, por kanë qenë këta tjetër”, ka thënë dëshmitari i shtatë.

Dëshmitari me kodin 1 shtoi se, “Sabit Geci nuk e ka goditur askënd për shkak të gjendjes së tij shëndetësore”.

Edhe seanca e së mërkurës është duke vazhduar të transmetohet kryesisht në seancë të mbyllur për publiku, por edhe në pjesë të redaktuara pas rikthimit në sesion publik, dëshmitari pretendon se 500 herë kanë pas rrahje gjatë mbajtjes në shtabin e Kukësit.

Ai këto deklaratat për rrahjet që u detyruan t’ia bënin njëri-tjetrit i tregoi pas pyetjes që prokurori i specializuar, Filippo De Minicis i bëri lidhur me një incident që kishte ndodhur në shtabin e Kukësit.

Pas kësaj deklarate të dëshmitarit, prokurori i specializuar, Filippo De Minicis ka vazhduar me pyetje të tjera që iu bënë në seancë të mbyllur për publikun.

Dëshmitari i shtatë i ZPS-së i pyetur se në 2-3 ditët e para a kishin mundësi të lëviznin jashtë shtabit, tha se, “lëvizja e tyre ishte e kufizuar gjatë mbajtjes në shtab dhe se këtë e kishin kuptuar me lidhjen e duarve që u kishin bërë”.

Edhe gjatë së martës seanca në pjesën më të madhe ka qenë e mbyllur për publikun.

Sipas speciales, “krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.