Përfundon dëshminë dëshmitari i 74-të në Speciale

Dëshmitari i 74-të në Dhomat e Specializuara të Kosovës (DhSK), ka përfunduar dëshminë në seancë krejtësisht të mbyllur.

Dëshmia e dëshmitarit të 74-të kishte nisur të mërkurën, pas përfundimit të dëshmisë së dëshmitarit të ish ushtarit të Ushtrisë Çlirimtare të Kosovës, Kurtesh Fondaj.

Fondaj, fillimisht ishte pyetur nga prokurori Matthew Halling nëse Skendër Hoxha, ka qenë profesionist dhe për vështirësitë që kishte në zonën që udhëhiqej nga ai.

Ndërkaq, është pyetur edhe për disa problematike që pretendohej se ka pasur Blerim Kuçi, sipas një dokumenti, por i cili s’është bërë publik për audiencën.

Ndërsa gjatë marrjes në pyetje nga avokati Ben Emmerson, ai është pyetur për qeverisjen e Bujar Bukoshit.

Sipas Fondaj, marrëveshja ushtarake gjatë kësaj udhëheqje kishte hyrë në fuqi para marrëveshjes politike.

Ai tha se marrëveshja politike s’kishte hyrë asnjëherë në fuqi.

Fondaj theksoi se “UÇK-ja s’u bë asnjëherë pjesë e ministrisë së Mbrojtjes në qeverisjen Bukoshi”.

Në ditën e dytë të dëshmisë së tij Fondaj është pyetur për raportin që ka pasur me njërin nga ish krerët e Ushtrisë Çlirimtare të Kosovës, Jakup Krasniqi.

Prej mbi 300 dëshmitarëve në total, deri më tani janë dëgjuar 73 prej tyre – shqiptarë, serbë, ekspertë ndërkombëtarë, ish-komandantë të UÇK-së e viktima të pretenduara të luftës – kryesisht në seanca të mbyllura.

Ish-presidenti i Kosovës, ish-kryeparlamentarët kosovarë dhe ish-shefi i deputetëve të Lëvizjes Vetëvendosjes (LVV), po akuzohen nga Zyra e Prokurorit të Specializuar (ZPS) për vrasje të pretenduara, torturë e trajtim mizor në periudhën midis viteve 1998–1999.

Në procesin gjyqësor që nisi më 3 prill 2023, katër ish-drejtuesit e UÇK-së u deklaruan të pafajshëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.