Deputeti gjerman: Jam kundër që anëtarësimi i Kosovë në BE të ndërlidhet me dialogun me Serbinë

Deputeti nga radhët e socialdemokratëve në Bundestagun (Parlamentin) e Gjermanisë, njëherit kryesues i delegacionit gjerman në Asamblenë Parlamentare të Këshillit të Evropës, Frank Schwabe, ka thënë se është kundër që të lidhet anëtarësimi i Kosovës në KiE me procesin e dialogut me Serbinë, ashtu siç kërkojnë disa shtete.

Këto komente, kryetari i Grupit parlamentar më të madh i përbërë nga 148 deputetë socialistë, demokratë dhe të gjelbër në Asamblenë Parlamentare të KiE-së, i ka bërë në një intervistë për televizion publik, ku ka theksuar se votimi me shumicë dërmuese i rekomandimit për anëtarësimin e Kosovës në KiE nga Asambleja Parlamentare ishte një hap i rëndësishëm.

“Ashtu siç kemi thënë, kjo do të thotë, se kemi bërë një hap të rëndësishëm, por siç dihet për anëtarësimin përfundimtar, duhet të votojë Komiteti i Ministrave të vendeve anëtare të Këshillit të Evropës. Ne, si deputetë, vetëm kemi dhënë mendimin tonë me një shumicë dërmuese që votoi pro. Nevojiteshin dy të tretat, por në fund rezultoi se kishim tri të katërtat e votave të deputetëve të pranishëm”, tha Schwabe.

“Ky fakt duhet të ketë ndikim edhe te Komiteti i Ministrave dhe nëse Kosova bëhet anëtare e Këshillit të Evropës, atëherë vendi do t’i nënshtrohet procedurave të monitorimit. Kjo do të thotë se të gjitha çështjet që lidhen me funksionimin e demokracisë, shtetit ligjor, të drejtat e njeriut, do të mbikëqyren në mënyrë strikte dhe për këto çështje do të bëhen vlerësime, ashtu siç ndodh me të gjitha vendet anëtare”, shtoi.

Sa i përket votimit në Komitetin e Ministrave, pra votimi final i cili i hap rrugë anëtarësimit të plotë të Kosovës në KiE, eurodeputeti gjerman ka theksuar se janë votat e nevojshme, derisa i përket ndërlidhjes së këtij procesi me dialogun me Serbinë, ai ka theksuar se është kundër një gjëje të tillë.

“Dy të tretat, mendoj se tashmë janë siguruar. Do të ketë dy të tretat e votave edhe në Komitetin e Ministrave. Dy të tretat kanë qenë të siguruara edhe më parë, por duhet parë nëse do të vije deri te votimi, nëse anëtarësimi do të vihet në rend dite për votim, pasi ka disa shtete që janë të përfshira në bisedimet që po zhvillohen ndërmjet Kosovës dhe Serbisë dhe duan që Këshillin e Evropës dhe anëtarësimin në Këshillin e Evropës, ta përdorin si mjet në bisedime dhe për këtë, unë jam kritik, pasi konsideroj se anëtarësimi në Këshillin e Evropës është vlerë në vete dhe nuk ka të bëjë fare me çështjen e dialogut”, potencoi Schwabe.

“Bisedimet, siç dihet bëhen me ndërmjetësimin e Bashkimit Evropian dhe me mbështetjen e vendeve të QUINT-it, dhe kjo nuk është fare çështje e Këshillit të Evropës. Prandaj, për arsyet që përmenda, nuk është e sigurt nëse do të vihet në votim. Sidoqoftë, ne kemi bërë një hap tjetër të rëndësishëm përpara”, shtoi.

Ndryshe, më 16 prill, Asambleja Parlamentare e Këshillit të Evropës ka votuar pro raportit për anëtarësimin e Kosovës në këtë organizatë.

Për miratimin e raportit të raportueses për Kosovën në KiE, Dora Bakoyannis, kanë qenë 131 vota pro, 29 kundër dhe 11 abstenime.

Para miratimit të raportit, Asambleja Parlamentare e KiE-së, i hodhi poshtë të gjitha amendamentet e propozuara nga Serbia.

Për t’u bërë anëtare e plotë e KiE-së, Kosovës i ka mbetur vetëm edhe një hap: votimi i Këshillit të Ministrave të Jashtëm në muajin maj.

Para votimit në Asamblenë Parlamentare, Komiteti për Çështje Politike dhe Demokraci i Këshillit të Evropës kishte rrëzuar amendamentin e deputetëve serbë përmes të cilit kanë kërkuar që të shtyhet vendimi për pranimin e Kosovës në KiE, derisa të themelohet Asociacioni i Komunave me Shumicë Serbe.

Po ashtu, ishte rrëzuar edhe amendamenti i propozuar nga deputetët italianë të cilët kanë propozuar që Kuvendi të konsiderojë se themelimi i Asociacionit duhet të merret parasysh si çështje në shqyrtimin e ardhshëm të Komitetit të Ministrave për aplikimin e Kosovës.

Ndryshe, Komiteti për Politikë dhe Demokraci në Këshillin e Evropës, më 27 mars, miratoi raportin e Bakoyannis, ku rekomandohet që Kosova të anëtarësohet në këtë organizatë. Pro votuan 31 përfaqësues të shteteve anëtare, katër kundër dhe një abstenoi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.