Shqipëria

Deputetët e PD-së kërkuan heqjen e imunitetit të ministres Xhaçka, mbyllet me debate mbledhja e Këshillit të Mandateve


Mbledhja e të premtes së 24 qershorit e Këshillit për Rregulloren, Mandatet dhe Imunitetin, për sa i përket mandatit të ministres për Evropën dhe Punët e Jashtme në Shqipëri, Olta Xhaçka, u mbyll me debate.

Ishte kryetarja e Komisionit, Lindita Nikolla, e cila hapi mbledhjen, duke lexuar edhe rregulloren.

Po ashtu, pala mazhoritare kërkoi kohë për të lexuar dokumentacionin e paraqitur nga opozita për heqjen e mandatit të ministres Xhaçka.

Pasi dëgjoi diskutimet, Nikolla miratoi kërkesën e socialisteve për të shtyrë mbledhjen.

Çfarë ndodhi gjatë mbledhjes?

I pari që foli, ishte kreu i Grupit Parlamentar të Partisë Demokratike, Enkelejd Alibeaj.

Ky i fundit bëri me dije se kërkesa e mocionit për Xhaçkën është nënshkruar nga 14 deputetë.

Sipas rregullores, për mbledhjen e këtij Këshilli duhet 1/10 e deputetëve të parlamentit për të kërkuar pavlefshmërinë e mandatit të deputetes Olta Xhaçka.

Kërkesa e tyre ka ardhur për faktin se një subjekt privat, të cilin e menaxhon bashkëshorti i Xhaçkës, ka marrë statusin e “investitorit strategjik” për të zhvilluar një projekt në bregdetin e Himarës, duke marrë kështu pronën publike për 30 vjet.

Sipas tyre, ka pasur favorizime për shkak të detyrës që Xhaçka ka në kabinetin qeveritar.

“Përveç depozitimit të mocionit, janë të bashkëlidhur dhe faktet dhe provat përkatëse, vendimet e Komisionit të Investimeve strategjike, dhënien e statusit të investitorit strategjik të shoqërisë që ka lidhje me Xhaçkan”, u shpreh Alibeaj në fjalën e tij.

Nga ana tjetër, kreu i Grupit Parlamentar, Taulant Balla, tha se PD-ja po bën teatër me çështjen e heqjes së imunitetit të ministres Olta Xhaçka.

“Diskutimi këtu është i karakterit kushtetues, nuk e heqim dhe as nuk e japim ne mandatin. Mandatin e heq Gjykata Kushtetuese”, tha Balla drejtuar palës opozitare, për sa i përket shtyrjes së mbledhjes për të lexuar dokumentacionin në detaje.

Balla vijoi se, “që të jemi korrektë me detyrën që na ka ngarkuar ne Kuvendi i Shqipërisë, gjithë dokumentacionin që ka ardhur, duhet ta verifikojmë”.

“Unë do të ulem bashkë me kolegët e mi gjatë ditës së sotme, të lexojmë dokumentacionin që, kur të vijmë këtu, të jemi seriozë me ata që na ndjekin”, theksoi Balla, teksa u shpreh se dokumentacioni nuk është lexuar për faktin se disa deputetë kanë pasur angazhime jashtë Shqipërisë.

Kërkesa për shtyrjen e mbledhjes erdhi nga deputetja socialiste, Klotilda Bushka.

Kujtojmë që Xhaçka e nisi karrierën politike në vitin 2009 si deputete e PS për Qarkun e Korçës.

Në mars të vitit 2017, ajo mori drejtimin e Ministrisë së Mirëqenies Sociale dhe Rinisë – post të cilin e mbajti për pesë muaj.

Më pas, po nga 2017-2021 mori drejtimin e Ministrisë së Mbrojtjes, duke zëvendësuar Mimi Kodhelin. Detyrën në krye të Mbrojtjes, Xhaçka e mbajti deri në janar të këtij viti.

Në fillim të vitit 2021, Xhaçkës iu besua Ministria për Evropën dhe Punët e Jashtme, ku zëvendësoi Gent Cakajn.

/Albanianpost.com


Lajmet kryesore