Deputetët demokratë do të kërkojnë komision për Reformën Zgjedhore

Përfaqësuesi demokrat Gazment Bardhi zbuloi të martën e 19 shtatorit se do të kërkojë që të ngrihet një komision për Reformën Zgjedhore.

Lajmi u bë i ditur pas mbledhjes me deputetët demokratë në Kukës.

“Jemi ndalur në agjendën parlamentare të kësaj jave që vjen ku në fokus ka qenë reforma zgjedhore. Sot grupi i PD-së ka autorizuar kryetarin e grupit që të propozojë projekt-vendimin për ngritjen e Komisionit për Reformën Zgjedhore”, u shpreh fillimisht Bardhi.

Ai bëri me dije se bashkë-kryetar do të jetë Oerd Bylykbashi ndërkohë që anëtarë do të jenë, Dhurata Çupi, Dashnor Sula, Ervin Salianji, Tomor Alizoti, Lindita Metaliaj, Shpëtim Idrizi, Fatmir Mediu dhe Petrit Vasili.

Sipas tij, komisioni do të asistohet nga ekspertë të OSBE- ODIHR’it.

Ish-kryeministri i Shqipërisë, Sali Berisha deklaroi pas mbledhjes së deputetëve demokratë se ishte një takim shumë i frytshëm.

“U shpreh solidariteti i plotë me Emri Vatën, i cili garon në Bashkinë e Kukësit pas një demaskimi moral dhe të gjithanshëm të përfaqësuesit të Edi Ramës, i cili ishte një copy-paste i Edi Ramës. Emri Vata ka besimin e plotë të të gjithë deputetëve të PD-së, besim se ai votën do e kthejë në shërbime transparente dhe përkushtim për qytetarët e Kukësit”, shtoi ish-kryedemokrati.

Ai shtoi se në mbledhje u diskutua gjerësisht mbi agjendën parlamentare dhe u morën vendime të cilat i komunikoi Bardhi më pas në një deklaratë për mediat e pranishme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.