Gjykata Themelore në Gjakovë, e ka dënuar me 19 vjet burgim të akuzuarin për vrasjen në Malishevë që kishte ndodhur në shtatorin e 2023-ës.
Lajmi është bërë i ditur përmes një komunikate për media.
“Pas shqyrtimit fillestar, ku i pandehuri e ka pranuar fajësinë sipas akuzës, kryetari i trupit gjykues Ilir Rashkaj, të akuzuarin I.Z., e shpalli fajtor dhe i shqiptoi dënim unik me burg për dy veprat penale në kohëzgjatje prej nëntëmbëdhjetë (19) vjet, në të cilin dënim do t’i llogaritet koha e kaluar në paraburgim nga data 20 shtator 2023”, thuhet në njoftimin e Gjykatës.
I njëjti dyshohet se viktimën A.B nga Komuna e Suharekës e kishte privuar nga jeta me dëshirë
Më 20 shtator të 2023-ës, një vrasje kishte ndodhur në fshatin Banjë të Malishevës.
Lajmin për Albanian Post e kishte konfirmuar zëdhënësi i Policisë për rajonin e Gjakovës, Sheremet Elezaj.
“Rreth orës 07:15 është raportuar se në fshatin Banjë-Malishevë, viktima mashkull i moshës madhore është gjetur pa shenja jete, dyshohet të jetë qëlluar me armë zjarri”.
“Ekipi mjekësor i cili ka dalë në vendin e ngjarjes ka konstatuar vdekjen e tij”, kishte thënë Elezaj për AP.
Nga Policia ishte thënë se një person ishte dorëzuar në polici dhe nga hetimet e para, dyshohej se i njëjti ka qëlluar viktimën me armë zjarri.
“Një person, po ashtu mashkull i moshës madhore, është dorëzuar në Stacionin Policor në Malishevë dhe nga hetimet e para dyshohet se i njëjti, për motive ende të panjohura, ka qëlluar viktimën me armë zjarri”.
Nga Policia, ishte thënë se po ndërmarrin të gjitha veprimet e nevojshme hetimore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
