Delegacioni i BE-së në Izrael anuloi pritjen për shkak të ministrit të ekstremit të djathtë

Delegacioni i Bashkimit Evropian në Izrael anuloi pritjen diplomatike të Ditës së Evropës të hënën për shkak të pjesëmarrjes së planifikuar të ministrit izraelit të ekstremit të djathtë Itamar Ben-Gvir, i cili e kritikoi vendimin si një formë “heshtjeje jodemokratike”.

“Fatkeqësisht, këtë vit ne kemi vendosur të anulojmë pritjen diplomatike, sepse nuk duam t’i ofrojmë një platformë dikujt, pikëpamjet e të cilit bien ndesh me vlerat që përfaqëson BE-ja”, thuhet në deklaratën e delegacionit.

Brukseli feston 9 majin si Ditën e Evropës për nder të deklaratës franceze të vitit 1950 që çoi në themelimin e organit që më vonë u bë BE.

Ministri i Sigurisë Kombëtare Ben-Gvir do të përfaqësonte qeverinë izraelite në veprimtarinë e këtij viti.

Reagimi i BE-së nënvizon, megjithatë, shqetësimet diplomatike me të cilat përballet koalicioni fetar-nacionalist i udhëhequr nga kryeministri Benjamin Netanyahu, aleanca e të cilit me Ben-Gvir dhe liderin e tij bashkëkombës Bezalel Smotrich ka shkaktuar shqetësim edhe tek aleatët ndërkombëtarë të Izraelit.

Ben-Gvir, lideri i partisë së ekstremit të djathtë Forca Hebreje, u dënua në vitin 2007 për nxitje raciste kundër arabëve dhe mbështetje të një grupi që Izraeli dhe Shtetet e Bashkuara e konsiderojnë një organizatë terroriste.

“Është turp që Bashkimi Evropian, i cili pretendon se përfaqëson vlerat e demokracisë dhe multikulturalizmit, i hesht në mënyrë jodiplomatike të tjerët”, tha Ben-Gvir në një deklaratë. “Miqtë dinë të shprehin kritikat dhe miqtë e vërtetë dinë gjithashtu ta dëgjojnë atë”.

Vetë Netanyahu është ende në pritje të një ftese për të vizituar Washington-in dhe lideri i opozitës Yair Lapid akuzoi qeverinë për “zgjedhje të luftimeve të panevojshme”.

“Menaxhimi i marrëdhënieve të jashtme të Izraelit është një çështje komplekse që kërkon ekspertizë dhe një qasje të zgjuar”, shkroi Lapid në Twitter, sipas Reuters.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.