Kompania e teknologjisë, DeepMind, ka njoftuar se inteligjenca artificiale do të përdoret për të trajtuar sëmundjet më vdekjeprurëse parazitare në botën në zhvillim.
Agjencia e lajmeve, BBC, tregon se laboratori në pronësi të Alphabet-it me qendër në Londër do të punojë me Drugs for Neglected Diseases Initiative (DNDI) për të trajtuar sëmundjen Chagas dhe Leishmaniasis.
Vite të tëra në laboratorë, shkencëtarët i kanë kaluar duke hartuar strukturat e proteinave.
Programi i quajtur AlphaFold i DeepMind-it, vitin e kaluar, ishte në gjendje të arrinte të njëjtën saktësi brenda disa ditësh.
BBC shkruan se shumë sëmundje janë të lidhura me rolet e proteinave në reagimet kimike katalizuese (enzimat) dhe luftimin e sëmundjes (antitrupave), duke vepruar si lajmëtarë kimikë (hormone të tilla si insulina).
Dhe njohja e strukturës 3D të një proteine është e rëndësishme në zhvillimin e trajtimeve për kancerin apo sëmundjet infektive.
“Ne kemi qenë të ngazëllyer nga potenciali për këtë teknologji për të ndihmuar në plotësimin e disa boshllëqeve në kuptimin tonë të biologjisë dhe përshpejtimin e kërkimit shkencor për të mundësuar trajtime të reja, efektive për sëmundjet”, ka thënë kreu i DeepMind-it për shkencën, Pushmeet Kohli.
Ai ka shtuar se “ne shpresojmë që AlphaFold-i të ketë një ndikim në botën reale në kuptimin tonë të sëmundjes dhe zbulimit të ilaçeve për komunitetet që kanë shumë nevojë për trajtime”.
Efektet anësore serioze
Për sa i përket sëmundjeve, Chagas dhe Leishmaniasis, ato prekin deri në 23 milionë njerëz në të gjithë botën. Por, rivendosja e barnave ekzistuese është provuar si joefektive.
“Pacientët e prekur nga sëmundje të neglizhuara si Leishmaniasis dhe sëmundja Chagas, mbështeten në trajtime të vjetruara që ndonjëherë janë toksike, kanë efekte anësore serioze dhe shpesh nuk janë të përshtatshme”, ka thënë udhëheqësi i zbulimit të DNDi-së, Ben Perry.
Gjithashtu ai shpreson që partneriteti do të çojë në zbulimin e ilaçeve që do të jetë e lehtë për t’u marrë nga goja.
“Inteligjenca artificiale mund të jetë një lojë-ndryshuese, duke parashikuar strukturat e proteinave për strukturat e proteinave të pazgjidhshme më parë, AlphaFold-i hap horizonte të reja kërkimore”, ka pohuar Perry.
Ai ka shtuar se “është zemëruese të shohësh teknologji të fuqishme të zbulimit të ilaçeve, duke mundësuar punën në disa nga sëmundjet më të neglizhuara në botë”.
‘Shpresë e madhe’
Janet Thornton, e Institutit Evropian të Bioinformatikës, është shprehur për BBC se “shumica e barnave të reja në vitet e fundit janë zhvilluar duke përdorur të dhëna proteina-strukturore si pjesë e procesit”.
Gjithashtu “ka shumë aspekte të tjera që duhet të merren parasysh, të cilat për shkak të mungesës së të dhënave, mund të mos jenë të përshtatshme”.
Por parashikimet do të ishin “veçanërisht të vlefshme” për patogjenët me struktura të panjohura proteinike, duke përfshirë disa sëmundje të neglizhuara.
“Zhvillimi i qasjeve të reja të inteligjencës artificiale për hartimin e barnave të tilla është një sfidë e re, por ndaj së cilës mund të zbatohen teknikat e reja dhe kjo tregon për një shpresë të madhe për të ardhmen”, ka shtuar ajo.
Aksesi pa pagesë
Vitet e fundit, DeepMind-i është kritikuar, pasi të dhënat nga sektori i tij shëndetësor transferoheshin te kompania e saj mëmë, Google.
BBC tregon se si rezultat, disa partnerë u tërhoqën nga aplikacioni Streams, i cili ndihmon mjekët dhe infermierët në disa spitale të monitorojnë pacientët me probleme të veshkave.
Por programi u përdor vitin e kaluar për të hartuar disa proteina të virusit Sars-Cov-2.
Virologët e përdorën këtë informacion për të kuptuar më mirë sesi sillej virusi
Gjithashtu DeepMind-i do të publikojë një letër të rishikuar nga kolegët që detajon punën e sistemit të vet, duke siguruar qasje pa pagesë në AlphaFold për komunitetin shkencor.
Njëkohësisht, planifikon që në të ardhmen të bashkëpunojë për trajtimin e sëmundjeve të tjera.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
