Daçiç: Mali i Zi s’është armiku ynë, por jemi të zhgënjyer që e mbështetën rezolutën për Srebrenicën

Ministri i Brendshëm i Serbisë, Ivica Daçiç, ka thënë se Mali i Zi nuk është armik i Serbisë, por se zyrtarët serbë janë të “zhgënjyer” që ky shtet votoi për rezolutën që shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Këto komente, Daçiç i bëri në një intervistë për median e afërt me regjimin në Serbi “TVPink” të premten, ku pretendoi se rezoluta nuk sjellë “pajtim”, por, sipas tij, “ndarje” dhe se qëllimi i saj është “t’i vërë lak Serbisë në qafë”.

Sipas korrierit më të madh të propagandës serbe, shtetet që nuk e kanë votuar rezolutën për Srebrenicën “as nuk do ta zbatojnë, pasi nuk është ligjërisht obligative”.

Ndryshe, Asambleja e Përgjithshme e Organizatës së Kombeve të Bashkuara (OKB) miratoi të enjten rezolutën që shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë. Rezoluta për Srebrenicën kaloi me 84 vota në favor, kundër 19 dhe 68 abstenime.

Rezoluta për Srebrenicën që u miratua mes kundërshtimit të ashpër të presidentitet serb, Aleksandër Vuçiç, dënon mohimin e gjenocidit të kryer nga serbët më 11 korrik 1995, përkundër se në rezolutë nuk përmendet as Serbia, as Republika Sërpska – entiteti serb në Bosnje e Hercegovinë.

Në Srebrenicë, forcat serbe të udhëhequra nga krimineli Ratko Mlladiç vranë mbi 8 mijë burra dhe djem myslimanë boshnjakë në korrik të vitit 1995. E përveç Serbisë, vendet e rajonit – Shqipëria, Mali i Zi, Maqedonia e Veriut e Kroacia – votuan në favor të rezolutës së hartuar nga Gjermania e Ruanda.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.