Një burrë nga Pekini është nën hetim penal, pasi ai u largua nga izolimi i detyruar në shtëpi, duke bërë që autoritetet të dërgojnë fqinjët e tij – më shumë se 5 mijë – në karantinë.
Veprimet e burrit, i cili më vonë rezultoi pozitiv me COVID-19, vijnë pasi kryeqyteti kinez dhe Shangai filluan të lehtësojnë masat.
Të hënën, zyrtarët deklaruan se 40-vjeçarit i ishte thënë të izolohej në shtëpi, pasi ai hyri në një shesh tregtar, të konsideruar si zonë e rrezikshme më 23 maj.
Autoritetet ngritën pretendime se, gjatë periudhës së tij të izolimit, ai “doli shumë herë dhe u zhvendos në komunitet, duke rrezikuar përhapjen e epidemisë”, përpara se ai dhe gruaja e tij të rezultonin pozitivë pesë ditë më vonë.
Në kundërpërgjigje, autoritetet urdhëruan 258 personat, që jetonin në ndërtesën e tij, të shkonin në qendrën qeveritare të karantinës dhe më shumë se 5 mijë të tjerë, që jetonin në komunitetin rezidencial, të qëndronin në shtëpi.
Kina ka vendosur kufizime të ashpra ndaj popullatës së saj, ndërsa punon për të eliminuar shpërthimet e variantit shumë të transmetueshëm Omicron të COVID-19.
Politika e Kinës për zero COVID është kritikuar për ndikimin e saj të rëndësishëm negativ në ekonomi dhe njerëzit, veçanërisht në Shangai, por udhëheqësi i vendit, Xi Jinping, ka dyfishuar kërkesat që ajo të vazhdojë dhe të ketë sukses.
Masat e rrepta kanë shkaktuar zhgënjim dhe lodhje të gjerë te banorët, por me numrin e rasteve të raportuara tani në rënie dhe kufizimet që kanë filluar të lehtësohen, njerëzit në internet reaguan me zemërim ndaj veprimeve të 40-vjeçarit.
Të dielën, autoritetet raportuan 122 raste të reja të komunitetit në të gjithë vendin, jashtë mjediseve të karantinës dhe duke përfshirë 102 transportues asimptomatikë.
Në Pekin, vetëm 12 raste të transmetuara në vend u raportuan të dielën dhe bibliotekat, muzetë, teatrot e palestrat u lejuan të rihapen në zonat ku nuk kishte pasur asnjë për të paktën shtatë ditë.
Autoritetet e Pekinit kishin kërkuar të shmangnin një bllokim masiv, por në vend të kësaj vendosën kufizime udhëtimi, detyruan punën nga shtëpia në disa rrethe, mbyllën ambientet publike dhe kryen bllokime të synuara të ndërtesave dhe zonave individuale.
Në Shangai, një bllokim prej muajsh do të përfundojë të mërkurën dhe qeveria ka njoftuar një sërë masash stimuluese ekonomike të krijuara për të adresuar dëmet.
Në një takim të paprecedentë me më shumë se 10 mijë zyrtarë javën e kaluar, kryeministri Li Keqiang paralajmëroi se ekonomia ishte në një “pikë kritike” dhe se do të kishte pasoja të rënda nëse zyrtarët nuk do të vepronin me shpejtësi dhe nuk do të balanconin kontrollet e COVID-19 me rritjen ekonomike.
Disa rajone kanë vendosur regjime testimi “rutinë”, çka do të thotë që të gjithë banorët të marrin një rezultat negativ PCR çdo dy-tri ditë, në mënyrë që të lëvizin me më shumë liri.
Vendet e testimit janë krijuar nëpër qytete, duke përfshirë Pekinin, Shangain, Shenzhen, Hangzhou dhe provincat Hebei, Henan dhe Jiangxi.
Në qytetin Sichuan të Langzhong-ut, autoritetet ndryshuan një kërkesë, sipas të cilës qytetarët të paguanin për testin e tyre të detyrueshëm javor, pas protestave publike.
Qarku Longxi në Provincën Gansu ka mandatuar gjithashtu teste javore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
