Covid-19: Dr. Fauci merr live vaksinën e Moderna-s

Dr. Anthony Fauci, eksperti i sëmundjeve infektive në ShBA, është vaksinuar në transmetim live kundër Covid-19.

I emëruar së fundmi nga presidenti i zgjedhur, Joe Biden, si këshilltari kryesor mbi Covid-19, Fauci ka vendosur ndryshe nga pjesa më e madhe e politikanëve në ShBA, të marrë vaksinën e kompanisë Moderna.

Menjëherë pas kryerjes së vaksinimit, Fauci u shpreh se ndihej i nderuar që po e merrte në transmetim direkt injeksionin. “Vaksina është një simbol i shpresës për ShBA-në dhe botën”, deklaroi ai.

Më vonë gjatë ditës, Fauci bëri me dije publikun se “deri në korrik të vitit 2021, pjesa më e madhe e amerikanëve do të jenë të vaksinuar”.

“Në pranverë çdokush mund të vaksinohet pa qenë pjesë e listës prioritare”, theksoi ai.

Vaksinimi i Dr. Fauci-t vjen pas një serie vaksinimesh live të emrave të njohur të politikës amerikane. Fillimisht ishte zëvendëspresidenti Mike Pence i cili e kreu atë. Më pas edhe presidenti i zgjedhur, Joe Biden, ndoqi të njejtën rrugë për të siguruar amerikanët se asgjë e keqe nuk vjen nga vaksina anti Covid.

Edhe përfaqësuesit në Kongresin Amerikan i janë nënshtruar vaksinimit. Ndër ta, Alexandria Ocasio-Cortez e ka kryer atë live në Instagram.

Ndërkohë që gjithë politikanët e tjerë kanë marrë vaksinën e prodhuar nga Pfizer-BioNTech, Dr. Fauci zgjodhi atë të kompanisë Moderna. Nuk dihet nëse kjo zgjedhje ka qenë e rastësishme, apo një mënyrë për t’i garantuar qytetarëve se të dyja vaksinat janë efikase dhe të sigurta./AlbanianPost.com

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.