Çoviç: Kërkesa për njohjen e pavarësisë së Kosovës është konvertuar në termin “pranimi i realitetit”

Për ish-pushtetarin serb, Nebojsha Çoviç, një enigmë ishte dhe do të mbetet fakti se kush do të jetë ai politikan serb që do të nënshkruaj pranimin e pavarësisë së Kosovës.

Sipas tij termi njohja e Kosovës tashmë është konvertuar në termin “pranimi i realitetit të Kosovës”, pas propozimit të një “kornize të re” në dialog i përpiluar së fundmi pas angazhimit të këshilltarëve për politikë të jashtme të Presidentit të Francës Emmanuel Macron dhe Kancelarit të Gjermanisë Olaf Scholz, të cilin e ka publikuar të dielën e 18 shtatorit, Albanian Post.

Megjithatë sipas tij Beogradi vazhdimisht ka deklaruar qartë se cilët janë kufijtë e tij kur fjala bie për pranimin e pavarësisë së Kosovës.

Ish-zëvendëskryeministri i Qeverisë së Serbisë më tej ka bërë të ditur se pret që në takimin e radhës në kuadër të dialogut Kosovë-Serbi të diskutohet propozimi për një “kornizë të re” në dialog i përpiluar.

“Unë e respektoj atë që tha Scholz në Beograd sepse ishte i sinqertë, kur tha se nuk do të ketë hyrje të Serbisë në BE derisa të njohë pavarësinë e Kosovës. Kemi një lojë të re fjalësh nuk përmendet më njohja fjala e re është pranim, pranoje realitetin, e cila bie e njëjta gjë”, ka thënë Çoviç, në një intervistë për Radio Televizionin Serb, RTS.

Ekskluzive, “korniza e re” në dialog: Marrëveshje përmbajtësore vitin e ardhshëm, finalja pas 10 vjetësh – Kosova fiton njohje nga 5-shja e BE’së, anëtarësim në organizata; Serbia përfiton ndihma masive

Të dielën e 18 shtatorit, Albanian Post publikoi dokumentin katër faqesh i cili paraqiste planin në kornizën e re për marrëveshje në mes të Kosovës e Serbisë, i përpiluar pas angazhimit të këshilltarëve të presidentit Emmanuel Macron dhe kancelarit Olaf Scholz.

Aty thuhet se në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht.

Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE.

Me marrëveshjen e vitit të ardhshëm (nëse pranohet propozimi) Kosovën e pranojnë edhe pesë shtetet që akoma nuk e kanë njohur të Bashkimit Evropian, kurse Serbia do të përfitojë një ndihmë masive financiare, asistencë ekonomike dhe do njihet si fuqia e rajonit.

“’Korniza e re’ të cilën e publikoi Albanian Post është propozimi i ri i ardhur direkt nga përfshirja e Macron e Scholz në procesin e dialogut, sepse siç thuhet në dokument ‘Kosova e Serbia në vete nuk do të mund ta zgjidhin kurrë problemin’”.

Dokumenti shpjegon logjikën prapa kornizës së re, përmban vizionin 10 vjeçar të zgjidhjes së problemit dhe jep një “makro-perspektivë”.

Përbëhet nga hyrja dhe më pas është i ndarë në tri segmente bashkë me tre nën-titujt që përmbajnë 13 pika.

Të gjitha segmentet shpjegojnë të ashtuquajturën “kornizën e re”, e cila u është prezantuar Albin Kurtit e Aleksandër Vuçiç-it.

Propozimi në fund parasheh edhe si të vazhdohet tutje nëse Kosova dhe Serbia nuk pranojnë këtë propozim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.