Çmimet e naftës ulen për shkak të ndikimit nga mbyllja e SVB-së

Çmimet e naftës ranë më shumë se 1 dollarë të martën, duke zgjatur rrëshqitjen e një dite më parë, pasi kolapsi i bankës SVB tronditi tregjet e aksioneve dhe nxiti frikën për një krizë të re financiare.

Lajmi u bë i ditur nga agjencia “Reuters”.

Kontratat e së ardhmes së naftës Brent ranë 82 cent, ose 1 për qind, në 79,95 dollarë për fuçi që nga ora 07:00 GMT.

Kontratat e së ardhmes së naftës së papërpunuar të Teksasit Perëndimor (WTI) ranë 82 cent, ose 1.1 për qind, në 73.98 dollarë për fuçi.

Të hënën, Brent ra në nivelin më të ulët që nga fillimi i janarit, ndërsa WTI ra në nivelin më të ulët që nga dhjetori.

Mbyllja e papritur e SVB Financial ngriti shqetësime në lidhje me rreziqet për bankat e tjera nga rritja e mprehtë e normave të interesit të Rezervës Federale të SHBA-ve gjatë vitit të kaluar.

Tregtarët nuk presin më një rritje të normës me 50 pikë bazë (bp) javën e ardhshme, me parashikimin aktual në 25 bp, madje edhe përpara publikimit të të martës të të dhënave të çmimeve të konsumit në SHBA.

Ekonomistët e anketuar nga Reuters kishin parashikuar se çmimet e konsumit u rritën me 0.4 për qind në shkurt, gjë që do të reduktonte rritjen vjetore të CPI në 6.0 për qind në shkurt dhe do të shënonte fitimin vjetor më të ngadaltë që nga shtatori 2021.

Inflacioni konsumator më i fortë se sa pritej në SHBA do të ushtrojë presion të mëtejshëm mbi çmimet e naftës në afat të shkurtër, thanë në një shënim analistët e Bankës Kombëtare të Australisë.

Përveç valëve tronditëse SVB, çmimet e naftës ishin gjithashtu nën presion për shkak të shenjave të një rikuperimi ekonomik më të dobët se sa pritej në Kinë, pavarësisht heqjes së kufizimeve të rrepta për COVID-19, tha analisti i CMC Markets Leon Li.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.