Vende

Cili është qyteti italian që ju ofron 30 mijë euro që të jetoni atje?


Presicce-Acquarica, një qytet plot diell në jug të Italisë ofron deri në 30 mijë euro për ata që dëshirojnë të zhvendosen atje.

Qyteti ka qenë duke luftuar prej kohësh me një popullsi gjithmonë e më shumë në rënie dhe banesa të vjetra të braktisura.

Për të shtuar numrin e popullsisë si edhe për të joshur në njëfarë mënyre pronarët e rinj të shtëpive, qyteti ka premtuar grante të majme për njerëzit që blejnë shtëpi dhe regjistrohen si banorë të qytetit.

Jeni të interesuar të blini pronë në këtë qytet të bukur? Ja çfarë duhet të dini.

Presicce-Acquarica – një komunë që përfshin dy qytetet Presicce dhe Acquarica del Capo – shtrihet në skajin jugor të rajonit të Pulia-s në Itali.

Qyteti i vogël ka vuajtur nga rënia e numrit të popullsisë pasi banorët janë zhvendosur në qytete të mëdha në kërkim të mundësive më të mira pune.

Tanimë, këshilli i qytetit kërkon të tërheqë pronarë të rinj shtëpish duke i stimuluar bujarisht me shuma të majme në para.

Detajet e skemës janë ende duke u finalizuar dhe aplikimet do të jenë së shpejti të disponueshme në faqen e internetit të bashkisë.

Për të aplikuar individët ose familjet duhet të zhvendosin rezidencën e tyre zyrtare në qytetin jugor italian.

Atyre u kërkohet gjithashtu të investojnë në një shtëpi të ndërtuar para vitit 1991, e cila është rreth 30 për qind e pronave të qytetit.

Kostoja e blerjes do të subvencionohet nga granti i dhënë nga këshilli i qytetit.

Ndihma financiare mund të përdoret gjithashtu për të mbuluar kostot e rinovimit.

Një maksimum prej 30 mijë eurosh është në dispozicion për pronarët e ardhshëm të shtëpive.

Këshilli po ofron gjithashtu shuma në para si stimulues për të ndihmuar në luftimin e plakjes së popullsisë së qytetit.

Pas vetëm 60 lindjeve krahasuar me 150 vdekje vitin e kaluar, qyteti do të japë 1 mijë euro për çdo të porsalindur.

E vendosur në zonën e njohur si Salento, Presicce-Acquarica është cilësuar si një nga fshatrat më të bukur të Italisë.

Rrugët e qendrës historike janë të veshura me pllaka të zbukuruara sipas stilit barok dhe sheshi kryesor ka një kishë të dekoruar në mënyrë luksoze.

Rreth fshatit ka fusha të tëra të mbushura me ullishte dhe vaji me cilësi të lartë i prodhuar nga këto pemë i ka dhënë qytetit pseudonimin e tij si “qyteti i arit të gjelbër”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore