Chelsea është afër transferimit të futbollistit të Ajax-it

Skuadra e Chelsea-t përsëri është njëra ndër më aktivet në këtë afat kalimtar veror.

Londinezët deri më tani më shumë kanë bërë largime nga ekipi, por tani ata synojnë edhe afrimet e emrave të rinj.

I fundit që po kërkohet nga skuadra londineze, është mesfushori i Ajax-it, Mohammed Kudus.

Drejtuesit e klubit anglez i kanë nisur kontaktet me Ajax-in, pasi “Blutë” kanë arritur akordin me lojtarin ganez.

Kudus ka kontratë me ekipin nga Amsterdami deri në verën e vitit 2025 dhe vlerësohet rreth 50 milionë euro, shifër të cilën londinezët duan ta diskutojnë ende.

Mediat britanike raportojnë se, Chelsea është një hap larg transferimit, pasi edhe Kudus po shtyn klubin holandez të pranojë ofertën e tyre pasi që dëshiron të luajë në Premier League.

Kujtojmë që futbollisti 22-vjeçar është pjesë e Ajax-it që nga vera e vitit 2020 kur u transferua nga skuadra daneze, Nordsjaelland, për shumën e 9 milionë eurove.

Në sezonin e kaluar ai pati paraqitje shumë të mira me fanellën e Ajax-it, duke shënuar 18 gola dhe duke dhuruar shtatë asistime në 42 ndeshje në të gjitha garat.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.