Chatbot-i i Google-it i dërgon aksionet në rënie pasi jep një përgjigje të gabuar

Debutimi i Google-it i një chatbot-i të ri të fuqizuar nga inteligjenca artificiale nisi me vështirësi.

Kjo pasi kompania e teknologjisë ndau informacione të pasakta në një video promovuese, duke lëkundur besimin e investitorëve.

Madhe kompania mëmë, Alphabet, humbi 100 miliardë dollarë në vlerën e tregut të mërkurën e 8 shkurtit, duke ushqyer shqetësimet se po humbet terren ndaj rivalit të Microsoft-it.

Teksa aksionet e Alphabet-it ranë deri në nëntë për qind, ato të Microsoft-it u rritën rreth tre për qind.

Sakaq, problemet e Google-it nisën pasi “Reuters”-i raportoi një gabim në reklamën e tij për chatbot-in Bard.

Kompania postoi një video të shkurtër duke premtuar se do të ndihmonte në thjeshtimin e temave komplekse, por në vend të kësaj dha një përgjigje të pasaktë.

Në reklamë, Bard-i pyetet se “për çfarë zbulimesh të reja nga teleskopi hapësinor James Webb (JWST) mund t’i tregohet një fëmije 9-vjeçar”.

Dhe Bard-i është përgjigjur me një numër përgjigjesh, duke përfshirë një që sugjeron se JWST është përdorur për të bërë fotografitë e para të një planeti jashtë sistemit diellor të Tokës, ose ekzoplaneteve.

Por fotot e para të ekzoplaneteve u morën nga Teleskopi i Madh i Observatorit Jugor Evropian (VLT) në vitin 2004.

Ndërkaq, gabimi u zbulua pak përpara një prezantimi nga Google-i, i cili gjithashtu nuk arriti të mahnitë investitorët.

“Kjo thekson rëndësinë e një procesi testimi rigoroz, diçka që ne po e nisim këtë javë me programin tonë të testuesit të besuar”, ka treguar një zëdhënës i kompanisë.

“Ne do të kombinojmë reagimet e jashtme me testimin tonë të brendshëm për t’u siguruar që përgjigjet e Bard-it përmbushin një nivel të lartë për cilësinë, sigurinë dhe bazën në informacionin e botës reale”, ka vijuar ai.

Kurse OpenAI, një startup që Microsoft-i po mbështet me rreth 10 miliardë dollarë, ka prezantuar në nëntor software që ka mahnitur konsumatorët dhe është bërë një fiksim në qarqet e Silicon Valley për përgjigjet çuditërisht të sakta.

Software-i i ri ChatGPT ka injektuar entuziazëm në firmat e teknologjisë pas dhjetëra mijëra shkurtimeve të vendeve të punës në javët e fundit.

Inteligjenca artificiale është bërë një fiksim për drejtuesit e teknologjisë, të cilët e kanë përmendur atë gjashtë herë më shpesh në thirrjet e fundit të fitimeve sesa në tremujorët e mëparshëm.

Apeli i kërkimit të drejtuar nga inteligjenca artificiale është se ai mund të nxjerrë rezultatet në gjuhë të thjeshtë, dhe jo në një listë lidhjesh, të cilat mund ta bëjnë shfletimin më të shpejtë dhe më efikas.

Megjithatë, mbetet e paqartë se çfarë ndikimi mund të ketë në reklamat e synuara, shtylla kurrizore e motorëve të kërkimit.

Sistemet chatbot të inteligjencës artificiale mbartin gjithashtu rreziqe për korporatat për shkak të paragjykimeve të natyrshme në algoritmet e tyre që mund të anojnë rezultatet.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.