Shqipëria

Çfarë mendojnë në Kroaci për Ballkanin e Hapur?


Ballkani i Hapur, konferenca e perbashket ne Oher

Kroacia është në Bashkimin Evropian qysh nga vitit 2013, prandaj si shtet ballkanik s’ka nevojë të bëhet pjesë e nismave rajonale, por në Kroaci inkurajojnë shtetet e Ballkanit Perëndimor që derisa të anëtarësohen në BE, s’ka gjë të keqe të bëhen pjesë e organizmave siç është Ballkani i Hapur.

Sipas analistit të politikës së jashtme nga Zagrebi, Denis Avdagiç, nisma e Ballkanit të Hapur sigurisht që nuk përbën kërcënim për anëtarët e saj, “dhe as nuk do ta vlerësoja si alibi për projektet të vendeve individuale që rrezikojnë vendet tjera”.

Në një intervistë për portalin Radio Televizionit të Malit të Zi, ai thotë gjithashtu se iniciativa në letër është parimisht e mirë, por se çështja e anëtarësimit është çështje e secilit vend, i cili duhet ta peshojë se çfarë i sjellë specifikisht Ballkani i Hapur.

“Duke deklaruar fillimisht se fatkeqësisht gjërat janë ngritur sikur Ballkani i Hapur është zëvendësues i Bashkimit Evropian (BE)”, pohon Avdagiç.

“Ballkani i Hapur nuk është domosdoshmërisht nismë kundërshtuese me Procesin e Berlinit, mund të jetë nismë plotësuese”.

“Në parim, në letër nisma është e mirë. Dhe në parim, unë besoj se heqja e cdo lloji barriere sjellë progres. Megjithatë, nga ana tjetër, ekziston frika se kjo nismë do të shërbejë si një lloj zëvendësimi për procesin e integrimit evropian”.

Analisti kroat, Denis Avdagiç

Sipas Avdgiç, anëtarësimi duhet të shoshitet nga secili vend veç e veç. “Të gjithë duhet ta peshojnë se çfarë përfitojnë”.

Megjithatë, ai thotë se gjërat nuk duhet të përzihen dhe se duhet të vazhdojë të mbetet e qartë se procesi që ndihmon në integrimin në strukturat e Bashkimit Evropian, është Procesi i Berlinit, derisa Ballkani i Hapur është një nisëm lokale.

Sa u përket zërave dyshues që e konsiderojnë Ballkanin e Hapur si një alibi për projekte si “Serbia e Madhe, apo Shqipëria e Madhe”, analisti kroat pohon se këto janë projeksione hipotetike që shkojnë shumë larg dhe s’janë të besueshme.

“Unë nuk do ta vlerësoja si të tillë nismën, Sigurisht, secili ka interesat e veta, pse propozon apo hyn në një nismë të caktuar, por ky projekt nuk është një kërcënim i drejtpërdrejtë për anëtarët e tij”.

Në Mal të Zi Ballkani i Hapur tashmë është temë e përditshme e politikes, meqë kryeministri, Dritan Abazoviç është shprehur pro dhe gjithashtu ka marrë pjesë në samitin e fundit në Ohër, derisa presidenti malazez dhe figura më e fuqishme politike në Mal të Zi, Milo Gjukanoviç, është treguar skeptik.

Lajm ka bërë ditëve të fundit edhe deklarata e presidentit të Alternativës Shqiptare atje dhe kryetari i Komunës së Tuzit, Nik Gjeloshaj, i cili shkroi se Mali i Zi jo që duhet të bëhet anëtar i Ballkanit të Hapur, por duhet të jetë boshti kurrizor i tij, derisa pohoi se duhet të anëtarësohet në këtë nismë edhe Kosova.

/Albanianpost.com


Lajmet kryesore