Byroja për konfiskimin e pasurisë, jo objektive dhe e varur nga pushteti

Njohësit e politikave administrative konsiderojnë se krijimi i një Byroje shtetërore, e cila do të jetë në shërbim të verifikimit dhe konfiskimit të pasurisë së pajustifikueshme është jetike, por se të njëjtit janë skeptikë për sa i përket funksionimit të saj marrë parasysh efikasitetin e prokurorive dhe gjykatave në vend.

Sipas tyre, Byroja për konfiskimin e pasurisë mund të shndërrohet në një organ politik, pasi zgjedhja e drejtorit të këtij institucioni do të bëhet me shumicë të thjeshtë të votave në Kuvend, e si rrjedhojë një gjë e tillë shkakton një nivel të ulët të objektivitetit.

Për hulumtuesen e lartë në Lëvizjen Fol, Albana Hasani, nevoja për krijimin e një Byroje të tillë është e pa diskutueshme, duke marrë parasysh nivelin e lartë të korrupsionit në shoqërinë kosovare.

“Por, se a do të ketë rezultate apo jo, mbetet të shihet pas hyrjes në fuqi të Ligjit”, pohon ai.

“Dëshira jonë është që të funksionojë si e tillë dhe të jap frytet e para të saj”.

Sipas saj, byroja si institucion i ri që do të krijohet, do t’i duhet shumë kohë që të vihet në funksion të zbatimit të detyrave ligjore.

Në anën tjetër edhe Yll Zekaj nga Instituti i Kosovës për Drejtësi, për AP potencon faktin se Byroja nuk është e pavarur në kuptimin objektiv.

“Drejtori i saj, i cili është autoriteti kryesor për fillim të procedurave të verifikimit dhe konfiskimit të pasurisë, zgjidhet me shumicë të thjeshtë nga Kuvendi dhe mund të shkarkohet lehtësisht. Kështu, Drejtori i Përgjithshëm— dhe rrjedhimisht Byroja— do të jenë objektivisht të varura nga partitë politike që zotërojnë shumicën në Kuvend”, pohon Zekaj.

Shqetësimi tjetër i Zekaj për Byron në fjalë, është mos harmonia e saj me Kushtetutën e vendit.

“Nuk ekziston një kontroll adekuat gjyqësor ndaj masave që Byroja mund të ndërmarrë për mbledhje të informacioneve. Njëherit, disa masa nuk duken të jenë të arsyeshme në aspektin juridik”.

Ndryshe, Qeveria e Kosovës, më 29 dhjetor të vitit të kaluar ka arritur ta miratoi Projektligjin për Byronë shtetërore për verifikimin dhe konfiskimin e pasurisë së pajustifikueshme, e cila të mërkurën e dy shkurtit me 7 vota pro dhe 2 abstenim kaloi edhe në Komisionin për Legjislacion.

Për Ministren e Drejtësisë, Albulena Haxhiu, Byroja në fjalë do të jetë në funksion dhe konsolidimit të shtetit.

“Ky projektligj ka për qëllim se në rast se Byroja vlerëson qe dikush ka pasuri e cila është e pajustifikueshme kërkon nga ai zyrtar, arsyetimin e parasë. Një nga debatet e shumta që është bërë në këtë drejtim ka qenë që kinse Byroja do ta konfiskojë pasurinë, por kjo nuk është e vërtetë, këtë e bën Gjykata Themelore në Prishtinë”, kishte deklaruar Haxhiu në Komisionin për Legjislacion.

Haxhiu, madje është zotuar se projektligji e përpiluar do të pamundësojë ndikimin e politikës në këtë institucion.

“Ky institucion nuk ka kompetenca hetuese por verifikuese. Ne frikën nuk mundem me ja heq askujt, por të punojmë së bashku që të bëjmë ligjin e mirë”, kishte shtuar ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.