Britania e Madhe e ka vlerësuar gjithë angazhimin shqiptar sa i takon çështjeve të sigurisë në Evropë dhe ato ndërkombëtare, mbi të gjitha me angazhimin e takimeve në kuadër të Procesit të Berlinit, i cili zhvillohet në Tiranë në tetor dhe përkushtimit diplomatik të vendit në organizatën e NATO-s dhe Këshillin e Sigurimit të OKB-së.
Lajmërimi ka ardhur nga faqja zyrtare e diplomacisë britanike, pas një takimi të kryeministrit shqiptar, Edi Rama, me sekretarin e Jashtëm britanik, James Cleverly.
“Sekretari i Jashtëm James Cleverly dhe kryeministri shqiptar Edi Rama diskutuan bashkëpunimin MB-Shqipëri në fusha kyçe me interes të përbashkët si Ukraina, Krimi i Rëndë dhe i Organizuar (SOC) dhe migrimi i paligjshëm në një takim gjatë Asamblesë së Përgjithshme të OKB-së në New York”, shkruhet në njoftim.
Më tej, aty thuhet se ata njohën forcën e partneritetit aktual dhe përparimin që kanë bërë të dy vendet në prioritetet e përbashkëta, veçanërisht në lidhje me emigracionin dhe marrëveshjen e re të kthimit të burgjeve, që nga vizita e Ramës në Londër, në mars.
Megjithatë, theksi është vendosur në angazhimin diplomatik shqiptar, sa i takon çështjeve të sigurisë dhe angazhimit të saj në organizata ndërkombëtare, si edhe përkushtimi për stabilitet në rajon në veçanti, me nismën e Procesit të Berlinit.
Këtë të fundit, për të parën herë, do ta presë jashtë kufijve të vendeve të BE-së Tirana.
Më herët, një njoftim sa i takon takimit e ka bërë edhe kryeministri Rama.
Kreu i Qeverisë ka postuar në median sociale “Facebook”, angazhimin e parë diplomatik gjatë takimit me ministrin e Jashtëm britanik, James Cleverly.
Në takim ishte pjesëmarrës edhe ministri për Evropën dhe Punët e Jashtme, Igli Hasani dhe ambasadori shqiptar Ferit Hoxha, në cilësinë tanimë të presidentit të Këshillit të Sigurimit të OKB-së.
Prej Komunikatës së Përbashkët të dhjetorit 2022 të kryeministrave të dy shteteve, Mbretëria e Bashkuar dhe Shqipëria e kanë përforcuar edhe më shumë bashkëpunimin mes tyre.
Gjatë kësaj periudhe, numri i shtetasve shqiptarë që shkojnë në mënyrë të paligjshme drejt Mbretërisë së Bashkuar ka rënë me 90 për qind krahasuar me vitin e shkuar, dhe është vënë re një rritje e numrit shtetasve shqiptarë, të kthyer në përmbushje të marrëveshjes së suksesshme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
