Braçe: Ndjehem keq kur propozimet e majta nuk votohen, jo pse mora 8 vota

Deputeti i Partisë Socialiste (PS), Erjon Braçe, me anë të një postimi në median e tij sociale Facebook, ka reaguar pas mosmiratimit të propozimeve të bërë nga ai vetë në Kuvendin e Shqipërisë.

Ai shkruan se, nuk ndjehet keq për tetë votat e marra, por kur “propozimet e majta nuk votohen”.

Sipas Braçes, e drejta, e vërteta nuk matet me vota, nuk relativizohet, nuk zhvlerësohet nga votat politike si dhe udhëheqësve ju duhet kohë të vijnë tek ajo që është e vërtetë dhe e drejtë.

Ish-zëvendëskryeministri thekson se, tetë votat pro janë një hap para për bujqit.

Në këtë mënyrë, ai ka bërë edhe një retrospektivë të propozimeve të tij.

“Në nëntor të 2018-ës, kur propozova tatim zero për rrogat deri në 40 mijë lekë, mora vetëm pesë vota pro. Këtë nëntor, Qeveria erdhi te propozimi im, vite me vonese dhe me 46 mijë e 800 lekë barrë fiskale mbi çdo shqiptar me rrogë 40 mijë lekë”, shkruan Braçe.

Ai në fjalën e tij në seancën plenare në Kuvend tha se ky buxhet ka nevojë për përmirësime, pasi është “goditur më i dobëti”.

Sipas Braçes, nuk duhen favorizuar bizneset e mëdha, por duhet vendosur një rregullator.

“Kam kërkuar disa herë në Kuvend reduktimin e listës së përjashtimeve fiskale për biznesin, sidomos për atë të madh. Së pari, doja të propozoja heqjen e reduktuar të 6% të tatimeve me vlerën e shtuar për të gjitha hotelet me 5 yje. Sepse për çdo investim të tyre paguhet vetëm 6% TVSH”, bëri me dije Braçe.

Deputeti njoftoi gjithashtu se ka propozuar heqjen e përjashtimit të favorizimit me tokë dhe me ndërtesë në shitjen e parë për të gjitha zonat rezidenciale jashtë qyteteve dhe vijën bregdetare.

“Propozimi tjetër”, theksoi ai, “lidhet me skemën e TVSH-së për bujqit”.

“Duhen përjashtuar këtu eksportuesit, që e kanë TVSH-në zero në eksport. Në këtë projektligj norma e kompensimit është rritur nga 6% në 20%. Norma e kompensimit me 20% neutralizon TVSH-në”.

Sipas tij, duhen vetëm 2 miliardë lekë për të rimbursuar direkt fermerët për TVSH-në.

“TVSH e inputeve bujqësore, nëse do të kishim një treg që funksionon normalisht, çmimet i cakton tregu, jo taksa. Ne, në tregun e inputeve bujqësore nuk kemi rregulla, kemi kartelë të 10 kompanive që përcaktojnë çmimet dhe nëse ne vendosim TVSH 10%, do transmetohet te kosto me të cilën bujku do të blejë çdo gjë”.

Pika tjetër, ku u ndal Braçe, ishte taksimi i pijeve alkoolike dhe heqja e favorizimeve për sektorin e birrës, pasi sipas tij favorizimet nuk mund të jenë të përjetshme.

Çfarë përmban paketa e re fiskale?

Nëse fermerët shisnin 1 produkt për 100 lekë, ata përfitonin 6 lekë rimbursim të TVSH-së, gjë që me këtë paketë të re fiskale shkon në zero.

Nga ana tjetër, fermerët duhet të vijojnë të paguajnë 20% të TVSH-së për produktet që blejnë.

Kjo skemë, shpesh, ka qenë e prekur nga ndryshimet e miratuara në Qeveri të ndryshme.

Kompensimi prej 6% u vendos si fillim në 2019-ën, pasi deri në atë kohë ishte 20%.

Në buxhetin e saj, Ministria e Bujqësisë ka parashikuar 12 miliardë lekë për fermerët nga 13.1 miliardë që ishin këtë vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.