Bota sipas Braverman-it

Shumë poshtë këmbëve tona, një gjigant mund të ketë filluar të lëvizë kundër nesh.

Bërthama e brendshme e Tokës, paralajmëruan shkencëtarët, ka ndaluar së rrotulluari në të njëjtin drejtim si pjesa tjetër e planetit.

Madje mund të rrotullohet në anën tjetër, sugjeroi një hulumtim i publikuar në janar të vitit 2023.

Ky “planet brenda planetit” mund të rrotullohet në mënyrë të pavarur sepse noton në bërthamën e jashtme të metalit të lëngshëm.

Autorët e studimit, Xiaodong Song dhe Yi Yang nga Universiteti i Pekinit të Kinës, thanë se ata zbuluan se rrotullimi i bërthamës së brendshme “u ndal afër rreth vitit 2009 dhe më pas u kthye në një drejtim të kundërt”.

Por efektet e tij u ndjenë edhe më tepër në rrugën “2 Marsham St”, pikërisht në Londër të Anglisë.

Bota e sekretares së brendshme britanike, Suella Braverman, u kthye me tërë mend përmbys.

Vrasja e bujshme e biznesmenit Ardian Nikulaj në qytetin e Lezhës mori përmasa ndërkombëtare.

Katër britanikë, të gjithë në rolin e vëzhguesve kishin qëndruar në hotelin e biznesmenit përpara atentatit të planifikuar deri në detaje.

Nga kamerat e sigurisë ishte filmuar shtetasja britanike Harriet Bridgeman, nga Bristol, si dhe personat e tjerë të shpallur në kërkim për vrasjen e Nikulajt: Harry Simson, Thomas Mithan, Steven Hunt.

Ata prezantoheshin si turistë, por në të vërtetë qëllimi që kishin ishte vëzhgimi i lëvizjeve të biznesmenit.

Britanikët, mes të cilëve, një çift, kishin ardhur njëri pas tjetrit në kohë të ndryshme.

Një prej tyre Stiven Hunt ka qëndruar për disa ditë edhe në hotelin “Coral” në pronësi të Nikulaj, siç është fiksuar edhe në kamera, kur hyn natën në hotel dhe gjen rojën në gjumë.

Hunt dyshohet se ka arritur të depërtojë edhe në sistemin e kamerave të sigurisë së biznesit, duke i dhënë grupit mundësinë të vëzhgojë në kohë reale lëvizjet e biznesmenit.

Burime nga Prokuroria thanë se pas vrasjes, portugezi dhe dy anglezë janë larguar po atë ditë duke kaluar më këmbë përmes pikës kufitare të Kapshticës, duke u regjistruar në sistemin TIMS për në drejtim të Greqisë.

Dy anglezët e tjerë ishin larguar me fluturim nga aeroporti ndërkombëtar “Nënë Tereza”.

Britanikët, sipas policisë, kanë qëndruar në disa hotele në zonën e Shëngjinit për të humbur gjurmët.

Madje, në një rast, njëri prej tyre, Steven Hunt, ka bërë edhe një tërheqje parash nga bankomati në vlerën 300 mijë lekë.

Në zyrën e autoriteteve britanike ose shteteve ku mund të gjenden katër shtetasit britanikë do të vijnë së shpejti letër-porositë për ekstradimin e tyre, paralajmëroi zyrtari i drejtësisë Ulsi Manja.

Etiketimi për shqiptarët gjatë vitit të kaluar nga Braverman si “kriminelë” dhe “pushtues” nuk do ishte një puhizë e lehtë mbi “la Manche” deri në Evropën Juglindore.

“Nëse Laburistët do të ishin në krye, ata do të lejonin të gjithë kriminelët shqiptarë të vinin këtu, do të lejonin të gjitha varkat e vogla të vinin në Britaninë e Madhe, do të hapnin kufijtë tanë dhe do të minonin totalisht besimin e popullit britanik në kontrollin dhe sovranitetin tonë”.

Migrimi i parregullt është një sfidë globale dhe një mentalitet i Anglisë së Vogël i adoptuar për qëllime të ngushta politike, gjithmonë do të dështojë.

Ishte ky qëndrimi editorial i prestigjozes “The Guardian” gjatë muajve të verës, pas çështjes së krijuar me numrin e shqiptarëve që kishin hyrë me varka në mënyrë ilegale në Mbretërinë e Bashkuar.

Një ditë më pas do të vinte reagimi i kryeministrit të Shqipërisë, Edi Rama, i cili akuzoi qeverinë britanike për përdorimin e qytetarëve shqiptarë si “koka turku” për politikat e dështuara të imigracionit.

Shqiptarët që jetojnë në Britani deklaruan se ishin demonizuar nga sekretarja e Brendshme britanike.

Lea Ypi, profesoresha shqiptare në London School of Economics, deklaroi për “The Guardian” se anëtarët e diasporës ishin “jashtëzakonisht të shqetësuar” nga komentet e ministrave, përfshirë Braverman.

“Ka pasur një kok turku të emigrantëve nga ministrat dhe shqiptarët rrezikojnë të jenë në shënjestër”, tha Ypi. “Vetë termi ‘pushtim’ po përdoret nga sekretarja e Brendshme. Është gjuhë nxitëse dhe po përdoret kundër një komuniteti të caktuar”.

Në ndërgjegjen e Braverman-it rëndon edhe rrëmbimi i dhjetra fëmijëve azilkërkues nga bandat në një hotel të Brighton-it, i cili ishte lidhur me Ministrinë e Brendshme britanike (Home Office).

I kontaktuar nga Albanian Post, gazetari i “The Guardian”, Mark Townsend konfirmoi në muajin janar se me shumë gjasë ka pasur edhe fëmijë shqiptarë të përfshirë në rrëmbim.

“Me siguri që ka edhe fëmijë shqiptarë të përfshirë”, shkroi ai.

Studiuesit Xiaodong Song dhe Yi Yang shteruan në publikimin e tyre se ndryshimi i drejtimit të rrotullimit të Tokës nisi në fillim të viteve 1970 dhe parashikuan se kthimi tjetër do të ishte në mesin e viteve 2040.

Për Braverman nuk parashikohet asnjë kthim deri në kërkesën e faljes më së paku. Në botën e saj të gjithë shqiptarët janë kriminelë, ndërsa katër kriminelë britanikë do të mbesin vetëm katër vrasës në kërkim ndërkombëtar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.