Borshi, oaza festive 5-ditore e South Outdoor Festival

Nën rrezet e ngrohta mesdhetare të pranverës, me traditën e bukur shqiptare në krah, nën tingujt e muzikës, fshati turistik Borsh është gati për të mirëpritur South Outdoor Festival (SOF).

Edhe nëntë ditë na ndajnë nga çelja e siparit të këtij festivali, ku ndërthuren sporti, kultura, muzika, natyra dhe kulinaria.

Data 29 prill do të shënjojë dhe traditën 5-vjeçare për të gjithë shqiptarët dhe për turistët e huaj.

Borshi-oaza festive

Përgjatë pesë ditëve (29 prill-3 maj) festivali, i cili për të pestin vit mbahet në fshatin Borsh, në jug të Shqipërisë, pret pjesëmarrës nga i gjithë vendi dhe Evropa.

Gjatë aktivitetit, qëllimi është vetëm një: bashkim, konkurrim dhe argëtim, në Rivierën shqiptare, pa target grup të përcaktuar.

“Ky festival nuk ka një target grup, pasi janë më shumë se 40 aktivitete të ndryshme në natyrë, të synuara për të gjitha grupmoshat dhe prejardhjet”, konfirmoi Këshilltarja për Turizmin, Dhurata Gazulli, shkruan Albanian Post.

Në vijim, ajo u shpreh se këtë vit “qëllimi ka qenë turizmi jashtë sezonit zyrtar turistik”.

Gazulli gjithashtu zbuloi se, ndonëse Borshi është epiqendra ku zhvillohet SOF, “ka shtrirje edhe në fshatra të tjerë”.

2022-shi cilësohet si shumë i veçantë për organizatorët e South Outdoor Festival, pasi kremtohet dhe 5-vjetori i tij.

Prandaj, këtë vit, argëtimi në SOF nuk përfundon me perëndimin e diellit.

“Ne do të festojmë së bashku 5-vjetorin tonë dhe për këtë rast të veçantë kemi përgatitur katër net me performanca të shkëlqyera. Katër emra të njohur të skenës ndërkombëtare të muzikës, si dhe më shumë se 20 artistë, do të luajnë edhe gjatë netëve”, shkruajnë organizatorët në faqen zyrtare të SOF.

Më tej, ata theksojnë se “nëse dëshironi të shijoni netët e ngrohta mesdhetare të pranverës me familjen dhe miqtë tuaj, si dhe të ndjeni atmosferën fantastike të festivalit, të gjitha këto mund t’i gjeni në Borsh, duke pirë edhe një birrë të ftohtë, apo një gotë verë të mrekullueshme shqiptare”, përcjell Albanian Post.

Muzikë dhe turizëm

Artistët shqiptarë, pjesë e skenës së SOF, do të jenë: Elvana Gjata, Elita 5, Eugent Bushpepa, Sardi Struga etj., dhe DJ të ndryshëm, si: Boocky DJ, DJ Mickey etj.

SOF, përveç emrave të skenës shqiptare, promovon edhe artistë nga vende të ndryshme të Evropës.

Këtë vit, pjesëmarrës do të jenë mjaft emra të huaj, si: DJ holandez, Fedde Le Grand dhe grupi muzikor italian “Eiffel 65”, të cilët kanë fituar popullaritet global me këngët “Blue” dhe “Move Your Body”.

Po ashtu, edhe grupi zviceran i muzikës elektronike Kadebostany, apo edhe grupi australian i rrokut Mixed Up Everything.

Në SOF nuk do të mungojnë edhe mjaft emra të tjerë, të cilët, sipas ekspertit të Marketingut, Genti Zavalani, i japin festivalit “një trajtë gjithëpërfshirëse” edhe për turizmin e huaj.

Sipas tij, kryesisht të targuar janë turistët nga: Kroacia, Sllovenia, Gjermania, Italia, Franca dhe Polonia, vende të cilat e frekuentojnë turizmin shqiptar.

Nëse e shikojmë nga pikëpamja e marketingut, një element tjetër shtytës, sipas Zavalanit, do të jetë edhe promovimi i produkteve të zonës.

“Një mënyrë e mirë për mundësi biznesi”, thekson ai.

Më afër natyrës

Festivali South Outdoor është eventi që ju jep mundësinë për të qenë “më afër natyrës”.

Nëpërmjet aktiviteteve në natyrë dhe ngjarjeve kulturore, vizitorët angazhohen si pjesëmarrës, duke shijuar kulturën shqiptare, traditën dhe kuzhinën.

Nga pikëpamja ekonomike, promovimi i zonës rrit kërkesën dhe, për pasojë, edhe përfitimet e saj.

Deborah Keçi, drejtuese e Klubit Sportiv Tirana, e përshkruan SOF si zgjedhjen ideale për “aktivitetet në natyrë, adrenalinë dhe shumë argëtim, i krijuar për ata që kanë qejf jetesën e shëndetshme dhe aktive”.

Mes aktiviteteve të shumta sportive, është edhe Trail Running – një nga sportet e jashtme, pjesë e platformës kryesore në botë të turizmit në natyrë.

Kush mund të marrë pjesë në SOF?

Festivali South Outdoor është eventi ku mund të marrë pjesë i madh dhe i vogël, adhurues të aktiviteteve në tokë, ajër, ujë, kureshtarë të natyrës dhe kulturës, me synimin e vetëm për ta kthyer Shqipërinë e Jugut në destinacion turistik ndërkombëtar.

Festivali mbështetet nga GIZ Albania në bashkëpunim me Ministrinë e Turizmit dhe Mjedisit, Agjencinë Kombëtare të Turizmit, Bashkinë Himarë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.