Bordi i ZRRE-së miraton të hyrat në vlerë 347 milionë euro – pritet ndryshimi i tarifave të rrymës

Kryesuesi i bordit të Zyrës së Rregullatorit për Energji (ZRRE), Ymer Fejzullahu, në konferencë për media ka thënë se në muajin janar kanë vërejtur ndryshime esenciale në parashikimet që i kishin bërë, kur e kishin publikuar raportin konsultativ ku përfshihej propozimi për shtrenjtim të rrymës.

Fejzullahu, ka thënë se këto ndryshime do t’i publikojnë, ndërsa njoftoi se tarifat e reja të energjisë elektrike pritet të miratohen në mbledhjen e radhës të ZRRE-së.

“Ndryshimi esencial është që ne i kemi marrë për bazë edhe kostot aktuale të muajit janar”, tha Fejzullahu.

Sipas tij, kostot të cilat janë realizuar kanë qenë më të larta se parashikimet.

“Kostot e realizuara në muajin janar kanë qenë më të larta se ato që i kemi parashikuar. Mirëpo i kemi pasur edhe disa komponente tjera të cilat kanë qenë shumë më të ulëta sesa që i kemi parashikuar”, shtoi ai.

Në bordin e ZRRE-së, u votuan të hyrat e lejuar maksimale të sistemit te transmisionit që ishte diskutim i mbledhjes së kaluar.

Shqyrtimi i Propozimit për të Hyrat e Lejuara Maksimale, për vitin relevant tarifor 2022 u miratua me 5 vota për Buxheti për të hyrat maksimale që u miratua është 347 milionë euro.

Hysen Rudari, ka kërkuar nga Bordi që të hyrat maksimale për furnizuesin  me shërbim universal të miratohen në këtë mbledhje.

Gjithashtu, nga bordi u miratua kjo vlerë me 347 milionë euro.

Po ashtu, bëri të ditur se janë duke i shqyrtuar të gjitha dokumentet.

“Përfshirë komentet e dërguara, të cilat do të trajtohen edhe në mbledhjen ku pritet të merret vendimi. E sigurt është që tarifat e energjisë elektrike do të ndryshojnë”.

Zyra e Rregullatorit për Energji (ZRRE), të premten e 28 janarit, ka publikuar komentet që ka marrë në kuadër të shqyrtimit të jashtëzakonshëm të tarifave të energjisë elektrike nga palë të ndryshme të interesit.

Sipas njoftimit të ZRRE-së, deri tani kanë pranuar komente nga Sekretariati i Komunitetit të Energjisë në Vjenë, Instituti për Politika Zhvillimore (INDEP), Operatorët e rregulluar KOSTT, KEDS dhe KESCO, ndërkohë që ka publikuar edhe linqet e tyre.

Ndërsa, në njoftim shihet se Qeveria e Kosovës nuk ka dërguar asnjë koment deri më tani.

Gjithashtu, ZRRE ka bërë të ditur se është duke pranuar komente nga ana e konsumatorëve të energjisë elektrike, ku komentet e tyre ZRRE, do t’i përmbledhë dhe do t’i publikojë gjatë ditëve në vijim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.